سەردێر

بەكارهێنانی جۆرێكی ڤاكسینی كۆرۆنا هەڵپەسێردرا

خەڵك-
دەسەڵاتدارانی تەندروستی كەنەدا بڕیاریان دا بە هەڵپەساردنی ڤاكسینی كۆرۆنا لە جۆری (جۆنسۆن).

ئاژانسی تەندروستی كەنەدا لە بەیانننامەیەكدا ئاماژەی بەوەكردووە، بڕیاریانداوە بە هەڵپەساردنی ڤاكسینی دژی كۆرۆنای بەرهەمهاتوو لەلایەن كۆمپانیای (یانسن فارماسوتیكلز) كە یەكێكە لە لقەكانی كۆمپانیای (جۆنسۆن ئاند جۆنسۆن)ی ئەمریكی.

ڕاشیگەیاندووە، ئەو بڕیارە بەهۆی دەستپێكردنی لێكۆڵینەوەیە لەگەڵ كۆمپانیای (یانسن فارماسوتیكلز) لە ئەمریكا سەبارەت بە ڤاكسینەكانی.

جەختیشی كردۆتەوە، لەگەڵ هەموو ئەو ڤاكسینانەی هاوردەی كەنەدا كراون ئەوە پەیڕەو كراوە، كە دابەش ناكرێن تاوەكو وەزارەتی تەندروستی دڵنیا نەبێتەوە لەوەی سەرجەم پێوەرەكانی كوالێتی و سەلامەتی و كاریگەری لە ڤاكسینەكەدا هەبێت.

ئاشكراشی كردووە، لەگەڵ كۆمپانیای (جۆنسۆن) و دامەزراوەی خۆراك و دەرمانی ئەمریكی لێكۆڵینەوە دەكەن لەسەر كوالێتی و سەلامەتی و كاریگەری ئەو بارهەڵگرە ڤاكسینانەی وەرگیراون.

لە چەند ڕۆژی ڕابردوودا كۆمپانیای (جۆنسۆن) ڕایگەیاندبوو، كە ژمارەیەك ڤاكسینی كۆرۆنای بێ‌ كەڵ بەرهەم هێنراوە لەلایەن كارگەكانی (یانسن فارماسوتیكلز) لە ڕۆژهەڵاتی (بالتیمور) و بەهۆیەوە نزیكەی 15 ملیۆن ژەم لە ڤاكسینەكە لەناوبراوە.