سەردێر

مووچەی هێزەكانی پێشمەرگە دەستكاری دەكرێتەوە

خەڵك-

ئەندامی لیژنەی پێشمەرگە لە پەڕلەمانی كوردستان ڕایدەگەیەنێت، پێویستە هەردوو یەكەی 70 و 80 لەژێر چەتری وەزارەتی پێشمەرگە تێكەڵ بكرێنەوە.

هەرچەندە فشارەكانی ئەریكا بۆ یەكخستنەوەی هێزەكانی پێشمەرگە بەردەوامە، بەڵام تاكو ئێستا پارتی و یەكێتی هێزی تایبەت بە خۆیان هەیە، بەشێوەیەك وەزارەتی پێشمەرگەش توانای بەدواداچوونی نییە لەبەرانبەر هەر بڕیارێك، كە دەیدات، بەڵكو زیاتر ئەو هێزانە فەرمانی حزبەكانیان جێبەجێ دەكەن، ئەمەش كاریگەری لەسەر دۆخی ئەمنی هەرێم هەیە.

سەعید هەركی، ئەندامی لیژنەی پێشمەرگە لە پەڕلەمانی كوردستان بە (خەڵك)ی ڕاگەیاند، دەبێت هەردوو یەكەی 70 و 80 بە دروستی تێكەڵ بكرێنەوە و لەژێر چەتری وەزارەتی پێشمەرگەدا بن.

سەبارەت بە زیادكردن و ڕێكخستنەوەی مووچەی هێزەكانی پێشمەرگە ناوبراو وتی، “هاوپەیمانان بەڵێنی ئەوەیان داوە ئەو دوو هێزە ڕێكبخرێنەوە و یەكبخرێنەوە، وەكو لیوا هاوبەشەكانی وەزارەتی پێشمەرگە مووچەكانیان ڕێكدەخرێتەوە، ئێستاش خەریكن و كاری لەسەر كراوە هەوڵ دەدرێت یەكبخرێنەوە”.

جەختی لەوەشكردەوە، پێش ئەوەی هێزەكانی پێشمەرگە تێكەڵ بكەیت، دەبێت ڕێكیان بخەیت لە ڕووی میلاكات و سەربازییەوە ئەوكات یەكبخرێن.