سەردێر

قائیمقامی سلێمانی لەسەر كرێكاران هۆشداری بە خاوەنی كارگەكان دەدات

خەڵك-
بەمەبەستی پێدانی ڕێنمایی و هەماهەنگی زیاتر، قائیمقامی سلێمانی لەگەڵ خاوەنی كارگەكانی سنوری سلێمانی كۆبووەوە و پیرۆزبایی ڕۆژی كرێكارانی ئاڕاستەی كرێكارانی كارگەكان و تەواوی كرێكارانی كوردستان كرد.

ئاوات محەمەد، قائیمقامی سلێمانی لەگەڵ نوێنەر و خاوەنی كارگەكانی سلێماندیدا كۆبووەوە، سەرەڕای باسكردنی دۆخی تەندروستی و ڕێگاكانی خۆپارێزی لە تووشبوون بە ڤایرۆسی كۆرۆنا، ڕێنمایی تەواوی پێدان بۆ پاراستن و پەیڕەوكردنی مافی كرێكاران لە ناوكارگەكاندا.

قائیمقامی سلێمانی پێیڕاگەیاندن، كە مەرجی یەكەمی ڕێگەدان بە كاركردنی كارگەكان پیادەكردنی مەرجەكانی تایبەت بە سەلامەتی گیان و تەندروستی كرێكارانە و لەو رشووەوە چاوپۆشی لە هیچ كارگە و خاوەن كارێك ناكرێت، لیژنەیەكی تایبەتی قائیمقامیەتیش چاودێری پاراستنی مافی كرێكاران لە ڕووی مووچە و دەستەبەری كۆمەڵایەتی و جێگای حەوانەوەی گونجاو و خواردنی تەندروست و پاراستنی لایەنی تەندروستی دەكات.

قائیمقامی سلێمانی باسی لە زیانە ماڵی و گیانییەكانی تەشەنەكردنی زیاتری ڤایرۆسی كۆرۆنا كرد و وتی، “دەبێت بە هەموو لایەك لە خەمی كەمكردنەوەی حاڵەتەكاندا بین بۆئەوەی نەگەین بە دۆخێك، كە تەندروستی و بژێوی ژیانمان بكەوێتە مەترسییەوە”.