سەردێر

بەرپرسە گەندەڵەكانی هەرێم دەدرێنە دادگا

خەڵك-

چالاكێكی مەدەنی ڕایدەگەیەنێت، لە هەوڵێكی چڕداین بۆ ئەوەی ئەو كەسانەی ڕۆڵیان هەبووە لە خراپكردنی ژێرخانی ئابووری هەرێم، بدەینە دادگا.

‎ژمارەیەك لە چالاكوانان و مامۆستایان لە بەرامبەر خراپ بەكارهێنانی دەسەڵاتی بەرپرسان و چەندین قەیرانی گەورە، كە هەرێمی كوردستانیان گەیاندۆتە ئەم دۆخە، هەڵمەتێكی فراوان ئەنجام دەدەن، كە تیایدا داوای دادگاییكردنی بەرپرسانی هەرێم دەكەن و چەندین ڕێگاش بۆ ئەو پرسە دەگرنەبەر.

‎تاریق تاهیر، مامۆستا و چالاكوانی مەدەنی بە (خەڵك)ی ڕاگەیاند، لە ئێستادا لە گفتوگۆداین لەسەر پرسی بەدادگایی گەیاندنی ئەوانەی ژێرخانی ئابووری ئەم وڵاتەیان وێران كرد.

وتیشی، “‎ئێمە چەندین ڕێگا دەگرینەبەر تا كەیسی گەندەڵی و پاشەكەوتی مووچە و لێبڕین و نەدانی مووچە و گرێبەستی پەنجا ساڵە و پرسی پێشێلكاری بەرامبەر خەڵكی ناڕازی و خۆپیشاندەران دەچێتە دادگاكا و ‎هەنگاوەكانیش تەنها ناوخۆیی نین”.

‎سەبارەت بە ناو و بەرپرسیارێتی ئەو كەسانەی ڕووبەڕووی دادگاكان دەكرێنەوە، ناوبراو ئاشكرایكرد، ئەوە لە داهاتوودا ڕادەگەیەنرێت و نامانەوێت قسەی لەبارەوە بكەین، تا هەماهەنگی فراوان دروست بكەین لەسەر ئەو كەیسانە ئەوكات بۆ میدیاكانی ئاشكرا دەكەین.

بەهۆی سەرهەڵدانی چەندین قەیرانی سیاسی و ئابووری و كۆمەڵایەتی، هەرێمی كوردستان ڕووبەڕووی گرفتی جۆراوجۆر بۆتەوە و هاووڵاتیانیش لە دۆخەكە نیگەرانن و بە بەردەوامی داوای چارەسەركردنی دەكەن.