سەردێر

هۆشداری لەكڕینی جۆرێك شیرینی دەدرێت

خەڵك-

سەرۆكی لیژنە هاوبەشەكانی قائیمقامیەتی سلێمانی ڕایدەگەیەنێت، دەستیان بەسەر بڕێك شیرینی ماوەبەسەرچوودا گرتووە كە بەشێوەی هەڵڕژاو بەسەر هاوڵاتیاندا ساغكراوەتەوە.
لەشكر حەمید سەرۆكی لیژنە هاوبەشەكانی قائیمقامیەتی سلێمانی بە (خەڵك)ی ڕایگەیاند، بەدواداچوون بۆ ئەو نوقڵ و شیرینیانە كراوە كەبەشێوەی هەڵڕژاو لەدوكانەكان و دەستگێڕەكان بە هاووڵاتیان دەفرۆشرێت، دەركەوتووە بەشێكی ماوەی بەكارهێنانیان بەسەرچووە كە شیاوی خواردن و بەكارهێنان نین.
وتیشی”بەپێی ڕێنماییەكانی تەندروستی، ئەو خواردن و خواردنەوانەی ماوەیان بەسەر دەچێت، پێكهاتەیان دەگۆڕێت بۆ مادەی زیان بەخش و زیان بەتەندروستی هاووڵاتیان دەگەیەنێت”.
ناوبراو داوا لە هاووڵاتیان دەكات، لەكاتی بازاڕكردن و كڕینی پێداویستی رۆژانە بەوردی سەرنج لە بەرواری دروستكردن و بەسەرچوونی بدەن و ئەو نوقڵ و چكلێتانەی بەهەڵڕژاوی دەفرۆشرێن مەكڕن، هەروەها لەكاتی بوونی گومان لەڕێگەی ژمارە مۆبایلی (07708677777)ـەوە پەیوەندی بە لیژنە هاوبەشەكانەوە بكەن.
ئاماژەی بۆئەوەكرد، لەهەر شوێنێك دەست بەسەر خواردن و خواردنەوەی ماوە بەسەرچوودا بگیرێت دادەخرێت و خاوەنەكەشی ڕووبەڕووی ڕێكاری یاسایی توند دەكرێتەوە.