سەردێر

خەڵك؛ ناو و وردەكاری پێكهێنانی بەرەیەكی نوێ‌ لە هەرێم ئاشكرادەكات

خەڵك-
بەرەیەكی نوێ‌ لە هەرێمی كوردستان بەناوی “بەرەی گەل” لە حزبەكانی دەرەوەی دەسەڵات پێكهێنرا و وتەبێژی بەرەكە دەڵێت: “پێناچێت بۆ هەڵبژاردنی ئەمجارە كاندیدیان هەبێت و بۆ داهاتووش بڕیاری نوێ‌ دەدەن”.

ڕێكار ئەحمەد، وتەبێژی بەرەی گەل و سكرتێری حزبی ڕزگاری كوردستان بۆ (خەڵك) ئاماژەی بەوەكرد، ماوەیەكی زۆرە خەڵك ناڕازییە لە سیستمی بەڕێوەبردنی هەرێم، بۆیە هەوڵ درا حزبەكانی دەرەوەی دەسەڵات لەگەڵ خەڵكی ناڕازی و گروپەكانی گوشار لە بەرەیەكی یەكگرتوودا كۆبكرێنەوە و ئەو بەرەیەش ناونرا “بەرەی گەل”.

ڕاشیگەیاند، ئەو بەرەیە چەند لایەنێكی سیاسی تێدا بەشدارن، كە لە ئێستادا ناوەكانیان بڵاوناكەنەوە بەو پێیەی گفتوگۆ لەگەڵ چەند لایەن و كەسایەتییەكی دیكەی ناو حزبەكان بەردەوامە و دەمانەوێت بەرەیكی بەهێز بێت پشتیوانی گەورەی جەماوەری هەبێت.

ئاشكراشی كرد، وەك لە ڕاگەیەنراوی بەرەی گەلدا بڵاومانكردۆتەوە، بە پێكهێنانی ئەم بەرەیە وا لە دەسەڵات بكرێت سیاسەتی برسیكردن و خەڵكی كوردستان لە نەهامەتی ڕزگار بكرێت و گەل خۆی خاوەنی بڕیارە و متمانەی خۆی لە گەندەڵكاران و وڵاتفرۆشان بستێنێتەوە.

وتیشی، “ماوەی ساڵێكە كاردەكەین بۆ ئەو بەرەیە، هەرچەندە بەتەواوی لایەنەكان كۆنەكراونەتەوە لەناو بەرەكەدا، بەڵام هەندێك لایەن وتویانە لەم كاتەدا ناتوانن بەشداربن، بەڵام هاوكار دەبن”.

سەبارەت بە بەشداری لە هەڵبژاردنەكان وتەبێژی بەرەكە جەختی كردەوە، لە ئێسادا و بۆ هەڵبژاردنی مانگی 10ی عێراق بەشداری ناكەین، بەڵام بۆ داهاتوو بڕیاری نوێ‌ دەكەن و ئەگەری ئەوەش هەیە پشتیوانی بۆ كاندیدێك ڕابگەیەنین یان بەتەواوی پڕۆسەكە ڕەتبكەینەوە بەهۆی تێبینیمان لەسەر كۆمسیۆنی هەڵبژاردنەكان.

(خەڵك) زانیویەتی، “چەند حزب و گروپێكی فشاری هەرێم چووونەتە ناو بەرەی گەل، كە حزبی ڕزگاری كوردستان و هاوپەیمانی نیشتمانی بە سەرۆكایەتی ئارام قادر-یان تێدایە”.

No description available.

No description available.