سەردێر

مووچەی بەشێكی مووچەخۆران ڕاگیرا و دەبێت پشتگیری ببەن

خەڵك-
بەهۆی پەیڕەو كردنی سیستمی بایۆمەتری مووچە و جێبەجێ‌ كردنی یاسای چاكسازییەوە مووچەی ئەو كەمئەندامانەی فەرمانبەر یان خانەنشینن ڕاگیرا و دەبێت پشتگیری فەرمانگەكانیان بكەن بۆ بەڕێوەبەرایەتییەكانی چاودێری و گەشەپێدانی كۆمەڵایەتی.

بەپێی یاسای چاكسازی و هەروەها بڕیاری حكومەتی هەرێم هەر كەمئەندامێك، كە فەرمانبەرە مووچەی كەمئەندامیەكەی ڕادەگیرێت و لەبری ئەوە دەرماڵەی كەمئەندامی لە فەرمانگەكەی بۆ دەبەسترێت و دەخرێتە سەر مووچەكەی.

دەروون عومەر، بەرێوەبەری گشتی چاودێری و گەشەپێدانی كۆمەڵایەتی گەرمیان لە ڕاگەیەنراوێكدا ئاماژەی بەوەكردووە، “داوا لە هەموو ئەو خاوەن پێداویستییە تایبەتانە دەكەین، كە دوو مووچەن لەم مانگەوە مووچەی كەمئەندامیان ڕاگیراوە، تكایە لەماوەیەكی دیاریكراودا پشتگیریەك لەو فەرمانگەیەوە بێنن كەتێدا دەوام دەكەن یاخود خانەنیشینن”.

بەپێی بڕیاری ئەنجوومەنی وەزیرانی هەرێم دوو جۆر مووچە دەدرێت بە كەمئەندامان، كە یەكێكیان بڕی 150 هەزار دینارە و بۆ ئەوانەیە هیچ مووچەیەكی دیكەیان نییە و فەرمانبەر نین و ئەوانەشی فەرمانبەرن یان مووچەی تریان هەیە بڕی 100 هەزار دینار وەردەگرن و كۆی گشتی پارەی پێویستی مانگانە بۆ مووچەی كەمئەندامان نزیكەی 12 ملیار دینارە.