سەردێر

پەڕلەمانی كوردستان یاسایەكی تایبەت بە شوێنەواری پەسەندكرد

خەڵك- ئارام سەردار
پەڕلەمانی كوردستان یاسای بەڕێوەبردن و پاراستنی شوێنەوارەكانی هەرێمی كوردستانی پەسەندكرد و بەپێی یاساكەش سزای ئەو كەسانە دەدرێت، كە پارچەی شوێنەواری دەدۆزنەوە و دەیفرۆشن.

لوقمان وەردی، سەرۆكی لیژنەی شارەوانی و كەلەپوور لە پەڕلەمانی كوردستان لە كۆنفڕانسێكی ڕۆژنامەوانیدا ڕایگەیاند، یاسای بەڕێوەبردن و پاراستنی شوێنەوارەكانی هەرێمی كوردستان، كەلایەن لیژنەكامانەوە پێشكەش كرابوو، دوای گفتوگۆیەكی زۆری ئەندامانی پەڕلەمانی كوردستان بە دەنگی ٧٤ پەڕلەمانتار پەسەندكرا.

وتیشی، “بڕیاریشە لەداهاتوو گفتووگۆ لەسەر پێشنیازە یاسای خانووە زێدەڕۆییەكان، كە هەمواركراوەتەوە لەبەرژەوەندی هاووڵاتیان بكرێت و پەسەندبكرێت و دواتریش یاسای خزمەتی شارەوانی گفتووگۆی لەسەر دەكرێت”.

دەشڵێت: “یاسای بەڕێوەبردن و پاراستنی شوێنەوار گرنگی زۆری هەیە سەڕەڕای دانانی سزا بۆ ئەو كەسانەی، كە پارچەی شوێنەواری دەدۆزنەوە و دەیفرۆشن، گرنگی دەدات بە چۆنییەتی دەستنیشانكردنی شوێنەوارەكان و دەستی لایەنە پەیوەندیدارەكانیش واڵا دەكات بۆ كنە و پشكنین و كاركردن تێیاندا”.