سەردێر

“كۆرۆنا فێری خوێندنی ئۆنلاینی كردین وەك زانكۆ جیهانییەكان”

سەرۆكی زانكۆی سلێمانی: كوالێتی خوێندن دانەبەزیوە

خەڵك-

سەرۆكی زانكۆی سلێمانی ڕایدەگەیەنێت، بەخۆشحاڵیەوە كۆرۆنا فێری كردین بتوانین وەكو زانكۆ جیهانییەكان خوێندن بەشێوەی ئەلكترۆنی و ئۆنلاین بەردەوامی پێبدەین.

ڕەزا حەسەن سەرۆكی زانكۆی سلێمانی بە دەنگی ئەمریكای ڕاگەیاند، پەتای كۆرۆنا كاریگەریەكی گەورەی كردووە لەسەر خوێندن، لەسەر هەموو بەشەكانی ژیان كاریگەری خۆی بەجێهێشتووە، بەڵام دیارە لەسەر خوێندن كاریگەرییەكەی زیاترە.

وتیشی”ئەم دۆخەی كۆرۆنا دروستیكردووە كاریگەری لەسەر هەموو خوێندكاران كردووە، بەڵام كاریگەریەكەی تەنها لەسەر زانكۆ یان لەسەر شوێنێك نییە كاریگەریەكەی ئەوەیە كە ڕەنگە لەسەردەمی كۆرۆنا ئەو وانانەی وەریدەگرن بەهێندەی ئەو وانانە نەبێت كە لەسەردەمێكی ئاساییدا وەریدەگرن بەڵام ئەمەش مانای ئەوە نییە خوێندن كواڵێتی نییە بەپێچەوانەوە توێژینەوەی مامۆستایان و لەناو كلاسەكانیش خوێندن لەناو كەمپدا دەكرێت تاقیكردنەوەكان لەناو كەمپدا دەكرێت”.

سەبارەت بە كۆتاییهاتنی پڕۆسەی ئەمساڵی خوێندن ڕەزا حەسەن ڕایگەیاند، 1-7 كۆتایی بە خوێندن دێت، لە 25-5 وە وەكو هەموو ساڵێك دەستدەكرێت بە تاقیكردنەوەكانی كۆتایی ساڵ هەتا ناوەڕاستی مانگی شەش، لەدوای ناوەڕاستی مانگی شەشەوە خولی دووەمیش لەدوای هەفتەیەك ئەنجامدەدرێت و لە 1-7 یش ئێمە كۆتایی بە پڕۆسەی خوێندن دێنیین وەكو ساڵانی ڕابردوو.

سەبارەت بە وەرگرتنی خوێندكاری نوێ، سەرۆكی زانكۆی سلێمانی جەختیكردەوە، تائێستا هیچ مەرجێكی تازە دانەنراوە بۆ وەرگرتنی خوێندكارانی پۆلی دوازدە، لیژنەی قبوڵی ناوەندی هەیە بۆیە دەبێت ئەوان بڕیاری لێبدەن.