سەردێر

پەكەكە بنكەیەكی توركیای لە كانی ماسی كردە ئامانج

هەپەگە كوژرانی 4 گەریلای لە ئاڤاشین راگەیاند

خەڵك-

هێزەكانی پارتی كرێكارانی كوردستان هێرشیان كردەسەر بنكەیەكی هێزەكانی توركیا لە هەرێمی كوردستان.

میدیای پەكەكە بڵاویكردەوە، سەرلەبەیانیی ئەمڕۆ چوار شەممە هێزەكانی بەرگری ئاسمانی شەهید دەلال هێرشیانكردەسەر بارەگای سەربازیی سوپای توركیا لە كانی ماسی.

تاكو ئێستا ناوەندی ڕاگەیاندن و چاپەمەنیی هێزەكانی پاراستنی گەل هەپەگە هیچ ڕوونكردنەوەیەكیان لەو بارەوە بڵاونەكردووەتەوەو هاوكات سوپای توركیاش تا ئێستا هیچ زانیارییەكی لەسەر ئەو هێرشە ئاشكرا نەكردووە.

ئەمەش لەكاتێكدایە، لە چەند ڕۆژی ڕابردوو سوپای توركیا ئۆپەراسیۆنێكی دژی بنكە و بارەگاكانی پەكەكە لە سنوورەكانی هەرێم دەستپێكرد.

هاوكات هەپەگە لە ڕاگەیەنراوێكدا ئاماژە بۆ ئەوە دەكات، لە ڕووبەڕووبوونەوەیەكیاندا لەگەڵ سوپای توركیا لە ناوچەی ئاڤاشین 4 گەریلا كوژران.

لەلایەكی دیكەوە بەهۆی شەڕی پەكەكە و سوپای توركیاوە سەدان گوندی سنووری دەڤەری بادینان بێ كارەبا بوون و مەترسی بۆ سەر رەوشی هاووڵاتیانی سنوورەكە دروست بووە.