سەردێر

لیژنەی باڵای بایۆمەتری دەربارەی بڕینی مووچە ڕوونكردنەوە دەدات

خەڵك-
لیژنەی باڵای بایۆمەتری حكومەتی هەرێم لەسەر قسەی پەڕلەمانتارێكی پارتی ڕوونكردنەوەیەك بڵاودەكاتەوە و ئاشكرای دەكات، مووچەی 16 هەزار و 505 كەسی فرەمووچەی نایاسایی ڕاگیراوە و كار لەسەر 36 هەزار مووچەخۆری تر دەكرێت.

لیژنەی باڵای بایۆمەتری حكومەتی هەرێم لە ڕوونكردنەوەكەدا ئاماژەی بەوەكردووە، “پەرلەمانتارێكی فراكسیۆنی پارتی لە كۆبوونەوەی ئەمڕۆی پەڕلەمان لە‌ قسە‌كانیدا ئاماژەی بەوەداوە، كە سە‌رپە‌رشتیاری لیژنەی باڵای تۆماری بایۆمەتری ئیمزا لەسەر ئەو فەرمانە ناكات، كە فرە‌ مووچەی نایاسایی و بن دیوارەكان فەسڵ بكرێن، بۆیە وەك لیژنە ئەو وتانەی ئەو پەڕلەمانتارە ڕەت دەكەینەوە”.

جەختیشی كردۆتەوە، “ئەو پەرلەمانتارە بەڕێزە لەبێ ئاگایی خۆیەوە ئەو قسانە‌ی كردووە‌”.

روونكردنەوەیەك لە لیژنەی باڵای بایۆمەترییەوە بۆ ڕای گشتی

لەكۆبوونەوەی ئەمڕۆی پەرلەمانی كوردستاندا، ٢٧/٤، پەرلەمانتارێكی فراكسیۆنی پارتی دیموكراتی كوردستان لە‌ قسە‌كانیدا ئاماژەی بەوەداوە كە بەرێز سە‌رپە‌رشتیاری لیژنەی باڵای تۆماری بایۆمەتری ئیمزا لەسەر ئەو فەرمانە ناكات كە فرە‌ مووچەی نایاسایی و بن دیوارەكان فەسڵ بكرێن.
وەك لیژنەی باڵای تۆماری بایۆمەتری ئەو ووتانەی ئەو پەرلەمانتارە رەت دەكەینەوە و رایدەگەیەنین؛ بەهیچ شێوەیەك شتی لەو جۆرە نییە و دوا بڕیاری لیژنە‌ش لە‌بارە‌یە‌وە‌ ئە‌وە‌ بوو كە‌ مووچە‌ی ١٦٥٠٥ كە‌س كە‌ فرە‌ مووچە‌ی نایاساییان ھە‌بوو راگیراوە و لە‌ھە‌مانكاتدا ئێستا لێكۆڵینە‌وە دە‌كرێت لە‌ موچە‌ی زیاتر لە‌ ٣٦٠٠٠ مووچە‌خۆریتر و دواتریش بڕیار لە‌سە‌ر ئە‌وانیش دە‌درێت‌. بۆیە‌ دیارە ئەو پەرلەمانتارە بەڕێزە لەبێ ئاگایی خۆیەوە ئەو قسانە‌ی كردووە‌، بۆ هەموو لایەكیشی ڕوون دەكەینەوە كەپرۆسەی بایۆمەتری بەردەوامە و یەكێكە لە‌ دەستكەوتە گرنگەكانی كابینەكانی هەشت و نۆی حكومەتی هەرێمی كوردستان.

لیژنە‌ی باڵای تۆماری بایۆمە‌تری