سەردێر

دارایی سەبارەت بە لیستی مووچە پەیامێك بە حكومەت دەدات

خەڵك-
ئەندامێكی لیژنەی دارایی لە پەڕلەمانی كوردستان دەڵێت: “داوامان كردووە مووچەی كەمئەندامان بە لیستی مووچەوە نەبەسترێتەوە” و جەختیشدەكاتەوە، 30 هەزار هاووڵاتی كەمئەندام 9 ساڵە چاوەڕێی بڕینەوەی مووچەی كەمئەندامین.

عومەر گوڵپی، ئەندامی لیژنەی دارایی پەڕلەمانی كوردستان بۆ (خەڵك) ئاماژەی بەوەكرد، لە ئێستادا نزیكەی 88 هەزار هاووڵاتی لە مووچەی كەمئەندامی سوودمەندن و 30 هەزار كەسیش لە ساڵی 2021ەوە چاوەڕێن ئەو مووچەیەیان بۆ ببەسترێت، بەڵام تا ئێستا هیچ بڕیارێكیان بۆ نەدراوە.

ڕاشیگەیاند، ئەو بڕە پارەیەی بە كەمئەندامان وەك هاوكارییە و مووچە نییە، بۆیە پێشنیازمان كردووە بە لیستی مووچەوە نەبەسترێتەوە و لەگەڵ لیستی مووچەی فەرمانبەران و خانەنشینان ڕانەگەیەنرێت، بەڵكو مانگانە بە ڕێكوپێكی لە ڕۆژێكی دیاریكراودا بدرێتە كەمئەندامان.

ئاشكراشی كرد، داوامان كردووە وەزارەتی تەندروستی كردووە هەموو تێچووی كەمئەندامان بە بێ بەرامبەر لە ئەستۆ بگرێت. هەوڵیش بدات بە بڕیارێك نەخۆشخانە تایبەتەكان بە خۆڕایی چارەسەری كەمئەندامان بكەن.

بەپێی بڕیاری ئەنجوومەنی وەزیرانی هەرێم دوو جۆر مووچە دەدرێت بە كەمئەندامان، كە یەكێكیان بڕی 150 هەزار دینارە و بۆ ئەوانەیە هیچ مووچەیەكی دیكەیان نییە و فەرمانبەر نین و ئەوانەشی فەرمانبەرن یان مووچەی تریان هەیە بڕی 100 هەزار دینار وەردەگرن.

بەپێی یاسای چاكسازی مووچەی فەرمانبەرانی كەمئەندام دەبڕدرێت و لەبری ئەوە دەرماڵەی كەمئەندامی دەخرێتە سەر مووچەكەی، كە تا ئێستا وەزارەتی دارایی بڕی دەرماڵەكەی دیاری نەكردووە.