سەردێر

گۆڕان وەڵامی توندی ڕاوێژكارێكی بارزانی دەداتەوە

خەڵك-
دوای ئەوەی ڕاوێژكارێكی سەرۆكی پارتی، دژوەستانەوەی خۆی بۆ هەڵوێستێكی گۆڕان ئاشكرادەكات لەو كاتەی پەڕلەمانتاری ئەو حزبە بووە لە بەغدا، بەرپرسێكی باڵای گۆڕان وەڵامی دەداتەوە و دەڵێت: “لەجیاتی خویندنەوەی سروشتی خۆیان و پرسیار دروستكردن لەسەرگومرایی خۆیان، پەلاماری لانەی دەركەوتنی خۆیان دەدەن”.

مەسعود حەیدەر، ڕاوێژكاری بارزانی لە لێدوانێكیدا ئاماژەی بەوەكردووە، ساڵی ٢٠١٦ گۆڕان داوای دەكرد عێراق ڕاستەوخۆ مامەڵە لەگەڵ پارێزگاكان بكات، بەڵام من دژیان وەستامەوە، بەمنیان وت تۆ خیانەتت كردوو، بەڵام من وتم نا ئەوەی ئێوە داوای دەكەن خیانەتە لە كوردستان.

لای خۆشیەوە، كاردۆ محەمەد، ڕێكخەری ژووری پەڕلەمانی بزوتنەوەی گۆڕان بەشێوەی ناڕاستەوخۆ وەڵامی ڕاوێژكارەكەی بارزانی دەداتەوە و دەڵێت: “گۆران. لە ئاشتكردنەوە سیاسەت بە نەوەی تازە، دەرفەتی بۆ دەیان گەنج ڕەخساند، بەشداری لە ژیانی گشتی و سیاسەتدا بكەن.”.

دەشڵێت: “بەشكیان دەركەوتن و هەڵكەوتن. بەشكیان سەرەڕای پێگە و ناسنامە و ناساندن، كەوتن”.

كاردۆ محەمەد ئاماژەی بەوەشكردووە، “لەجیاتی خویندنەوەی سروشتی خۆیان و پرسیار دروستكردن لەسەرگومرایی خۆیان، پەلاماری لانەی دەركەوتنی خۆیان دەدەن بۆ ئامراز و دنیایەكی باشتر نا، بەلكو بۆ پاراستنی سیستەمە پڕوپوچەكەی كە خۆیان تێیدا بورغویەكی بچووكن”.

ئەم لێدوانە دژانەی نێوان بەرپرس و كادرانی گۆڕان و پارتی لەكاتێكدایە، كە ئەمڕۆ كرژی و شەڕە قسە لەنێوان پەڕلەمانتارانی گۆڕان و پارتی لە كۆبوونەوەی پەڕلەمان سەبارەت بە لێبڕینی مووچە دروست بووە.