سەردێر

پەكەكە بە مووشەك هێرشی كردە سەر بنكەیەكی سەربازی توركیا

خەڵك-
بنكەیەكی سەربازی سوپای توركیا لە پارێزگەی دهۆك، لەلایەن گەریلاكانی پارتی كرێكارانی كوردستانەوە دووچاری هێرشی مووشەكی بۆوە.

ئەمڕۆ سێ‌ شەممە، سەرچاوە خۆجێییەكان لە پارێزگەی دهۆك ڕایانگەیاند، گەریلاكانی پارتی كرێكارانی كوردستان (پەكەكە)، بە دوو مووشەك بنكەیەكی سەربازی سوپای توركیایان لە ناوچەی شیلادزێ‌ بۆردومان كرد.

سوپای توركیا لە ماوەی چەند ڕۆژی ڕابردوو، لە ناوچەكانی ناحیەی (كانی ماسی) دەستی بە ئۆپەراسیۆنی سەربازی كردووە و چەند خاڵێكی ستراتيژی سەربازیشی لە دەوروبەری ناحیەكە داناوە.

هەروەها لەم ماوەیەدا، پێكداهەڵپژانەكانی نێوان گەریلاكانی پارتی كرێكارانی كوردستان و سوپای توركیا زیاتر بوو، تۆپباران و هێرشی ئاسمانیش لەلایەن توركیاوە لە ناوچەكەدا چڕِكراوەتەوە.