سەردێر

هەرێم، بودجەیەك بۆ وشكەساڵی تەرخان دەكرێت

خەبَك-

جێگری سەرۆكوەزیرانی هەرێمی كوردستان سەرپەرشتی كۆبوونەوەیەكی تایبەت بە وشكەساڵی كرد و رایگەیاند، بودجەیەكی تایبەت بۆ وشكەساڵی تەرخان دەكرێت و لەگەڵ وڵاتانی دراوسێش گفتوگۆ دەكرێت.


لایە‌نە‌ پە‌یوە‌ندیدارە‌كانیشی راسپارد بۆ ھە‌ماھە‌نگیكردن بە‌مە‌بە‌ستی كە‌مكردنە‌وە‌ی زیانە‌كانی وشكە‌ساڵی و دانانی پلانی گونجاو بۆ رووبە‌رووبونە‌وە‌ی.
ئەمڕۆ دووشەممە بە سەرپەرشتی قوباد تاڵە‌بانی جێگری سەرۆكی ئە‌نجوومە‌نی وەزیران و ئامادەبوونی بریكاری وەزارەتی كشتوكاڵ و سەرچاوەكانی ئاو و پارێزگارانی هەولێر، سلێمانی، دهۆك، هەڵەبجە و سەرپەرشتیارانی ئیدارەی راپەڕین و گەرمیان و نوێنەرانی وەزارەتەكانی شارەوانی و پلاندانان، كۆبوونەوەیە‌كی تایبەت بەشێوازەكانی ڕووبەڕووبوونەوەی وشكەساڵی لەهەرێمی كوردستان بەڕێوە‌چوو.

لە‌كۆبوونە‌وە‌كە‌دا بە وردی باس لەكاریگەرییەكانی كە‌مبارانی و وشكە‌ساڵی لەسەر ناوچە جیاجیاكانی هەرێم كرا و پلانی حكومە‌ت و لایە‌نە‌ پە‌یوە‌ندیدارە‌كان بۆ رووبەڕووبوونە‌وە‌ی ئە‌و دیاردە‌یە خرایەڕوو‌.

هەر لەوبارەیەوە و بەمەبەستی كەمكردنەوەی زیانە ئابورییەكانی وشكەساڵی لەسەر سێكتەرە جیاوازەكان، بودجەیەكی تایبەت تەرخانكرا و بڕیاردرا كە ئەولەویەت بدرێت بەزامنكردنی دابینكردنی ئاوی پاك بۆ هاووڵاتییان گرنگی بدرێت بە پرۆژەكانی كەرتی كشتوكاڵی و پیشەسازی.

لەدوای تاوتوێكردنی هەمەلایەنەی شێوازەكانی رووبەڕووبوونەوەی ئەم دیاردەیە لەسەر هەرێمی كوردستان، پێویستی دانانی پلانی گونجاو و تەرخانكردنی بودجەی پێویست دووپاتكرایەوە بۆ دروستكردنی بەنداوی بچوك لەپێناو گلدانەوەی ئاوی باراناو و دواتر سود لێوەرگرتنەوەی لەبواری كشتوكاڵیدا.

هاوكات لەكۆبوونەوەكەدا بڕیاردرا لەگەڵ حكومەتی فیدراڵ ئەم پرسە باس بكرێت بۆ ئەوەی هاوكاربن لەچارەسەركردنی هەر گرفتێكدا كەرووبەڕووی هەرێم ببێتەوە بەهۆی كاریگەرییەكانی وشكەساڵییەوە.

هەروەها جەخت لەوەكرایەوە كە دەبێ حكومەتی هەرێمی كوردستان لەڕێی كەناڵە دیبلۆماتییەكانییەوە لەگەڵ وڵاتانی دراوسێ هەماهەنگی بكات بۆ كۆنترۆڵكردنی شێوازەكانی بەردانەوەی ئاوی بەنداوەكان بەجۆرێك كە بە‌رژە‌وە‌ندی هەرێمی كوردستان لە‌بە‌رچاو بگیریت و ئەو بارگرانییە كەمبكاتەوە كەبەهۆی ووشكەساڵییەوە رووبەرووی ناوچەكە دەبێتەوە.