سەردێر

بە بەشداری 6 هەزار كەس، تاقیكردنەوە لە سورەتێكی قورئان ئەنجام دەدرێت

خەڵك-

بەرپرسی لقی ئامادەییەكانی سلێمانی ڕێكخراوی گەشەپێدانی قوتابیانی كوردستان ڕایدەگەیەنێت، زیاتر لە 6 هەزار كەس بەشداری تاقیكردنەوەی لەبەركردنی سورەتێكی قورئانی پیرۆز دەكەن.

ئەنوەر عەرەب بەرپرسی لقی ئامادەییەكانی سلێمانی ڕێكخراوی گەشەپێدانی قوتابیانی كوردستان بە (خەڵك)ی ڕاگەیاند، ڕێكخراوی گەشەپێدانی قوتابیانی كوردستان لە چوارچێوەی كارەكانیدا و كاركردن لە بواری پەروەردەی ئیسلامی لە مانگی ڕەمەزان پڕۆژەیەكی ڕاگەیاند بەناوی بەهاری دڵان بۆ لەبەركردنی سورەتی محەممەد و تەجوید و وشە و ماناش لەخۆدەگرێت.

وتیشی”پڕۆژەكە لە سەرجەم لقەكانی ڕێكخراوەكە لە هەرێمی كوردستان بەڕێوەدەچێت و
بڕیارە ڕۆژی هەینی 30-4 تاقیكردەنەوەیەكی گشتی یەكگرتوو ئەنجام بدرێت و 30 كەسیش خەڵات دەكرێن”.

ئاشكراشیكرد، هەرچەندە ڕێژەی ئەو كەسانەی بەشداری دەكەن لە زیادبووندان، بەڵام تاكو ئێستا زیاتر لە 6 هەزار كەس بەشداری تاقیكردنەوەكە دەكەن.

ڕێكخراوی گەشەپێدانی قوتابیانی كوردستان لە چوارچێوەی كارەكانیدا ساڵی ڕابردوو پڕۆژەی نووری جیهانی ڕاگەیاند كە پڕۆژەكە خوێندنەوەی كورتەیەك لە ژیاننامەی پێغەمبەری خوا (درودی خوای لەسەر بێت) بوو، دواتر لە شارەكانی هەرێمی كوردستان زیاتر لە 5 هەزار كەس تاقیكردنەوەی تێدا ئەنجامدا.