سەردێر

بەڕێوەبەری پەروەردەی هەڵەبجە: خوێندنی ئەلیكترۆنی كێشەی بۆ دروست كردووین

خەڵك-

بەڕێوەبەری پەروەردەی پارێزگای هەڵەبجە ڕایدەگەیەنێت، خوێندنی ئەلیكترۆنی خاڵیە لەپەروەردەكردن، تەنها فێربوونە، فێربونێكی وشك.

سۆران عومەر مستەفا بەڕێوەبەری گشتی پەروەردەی پارێزگای هەڵەبجە بە دەنگی ئەمریكای ڕاگەیاند، كاتێك لیژنەی باڵای ڕووبەڕووبوونەوەی كۆرۆنا خوێندنی ئۆنلاین و ئەلكترۆنی كردە خوێندنی ئیلزامی، سەرەتا وەكو خوێندنێكی پاڵپشتیكار بوو بەڵام بەهۆی كۆرۆناوە كردی بە خوێندنێكی ئیلزامی، لەسنورەكەی من و لەتەواوی هەرێمی كوردستاندا ئەگەر ڕاستگۆبین بەڵێ كێشەی دروستكردووە و كەموكورتی هەیە.

وتیشی”كێشەكان جۆراوجۆرن، هەمووان دەزانن ژێرخانێكی مەعریفی لەبواری ئەلكترۆنیمان نیە، خوێندكار و دایك وباوكی خوێندكاران ناتوانن بەكارهێنەرێكی باشی ئامێرە ئەلكترۆنییەكان بن، ئەمە یەكێكە لەكێشەكان، كێشەیەكی تر ئەوەیە لە هەرێمی كوردستان لەهەندێك جێگە كێشەی هێڵی ئینتەرنێتمان هەیە، یەكێكی تر لەكێشەكان ئەوەیە هەندێك لە مامۆستایان ناتوانن وەك پێویست مۆبایلی زیرەك بەكاربهێنن”.

ئاشكراشیكرد، هەموو بەڕێوەبەرە گشتییەكان زانیومانە ئەمجۆرە لەم كێشانە هەیە بەڵام وەزارەتی پەروەردە و لیژنەی باڵای ڕووبەڕووبوونەوەی كۆرۆنا ئەم ڕێگاچارەی بۆ كەمكردنەوەی زیانەكان بەكارهێناوە، دەزانین خوێندنی ئەلكترۆنی لە هەرێمی كوردستاندا نابێتە جێگرەوەی ناوپۆل، بەڵام بەناچاری ئەم خوێندنەی كردووەتە خوێندنێكی پاڵپشتیكار و ئیلزامی بۆئەوەی لەم دۆخە دەربازمان بێت و خوێندكارانمان ساڵێكیان نەفەوتێت.

باسی لەوەكردش”داوامان لە وەزیری پەروەردە كردووە كۆبوونەوەیەك بكەین تا تەواوی ئەو كێشەو گیروگرفتانەی كە لە 17 ی مانگەوە دەستمان بەم پڕۆسەیە كردووە ڕاپۆرتمان ئامادەكردووە و تێیدا تەواوی گیروگرفتەكان جارێكی تر دەخەینەوە بەردەست، لەهەموو دنیادا هەوڵێك دەدرێت بۆ جێبەجێكردنی كارێك سەركەوتوو نابێت تیایدا ئێمە بە وەزارەت دەڵێین كە ئێمە تا ئەم سنورە سەركەوتوو بووین لەخوێندنی ئەلكترۆنیدا، وەكو باسمكرد ئەمە خوێندنێكی پاڵپشتیكارە ئەگەر وەزارەتی تەندروستی هەڵسەنگاندن و ڕێنماییەكانی بۆ ڕەوشی كۆرۆنا باشتربێت ئێمە داوادەكەین كە بچینەوە ناو ناوەندەكانی خوێندن و بچینەوە خوێندنی ڕووبەڕوو.

سەبارەت بە چارەنوسی پڕۆسەی خوێندن لە ئەمساڵدا؟ ناوبراو ڕایگەیاند، ئەم ئۆفەر و بژاردەیەمان خستووەتە بەردەستی خوێندكار و مامۆستا و كەسوكاری خوێندكار وتومانە بەمشێوەیە ئێوە كۆششی خۆتان بكەن و مومارەسەی ئەم وانانە بكەن لەكاتی تاقیكردنەوەكانیشدا فەرموو وەرنەوە ئێمە تاقیكردنەوەتان دەكەین، واتە وەزارەتی پەروەردە و حكومەتی هەرێمی كوردستان هەموو هەوڵی بۆ ئەوەیە كە ساڵێكی خوێندنی خوێندكارانمان نەفەوتێت بەهەر نرخ و ئامڕازێك بووە، ئەمەش تاكە ڕێگەیە بتوانیین خوێندنی پێڕزگار بكەین، ئەگەرنا بەرەو هەفتەی كۆتایی مانگی چوار دەڕۆین كاتمان لەبەردەستدا نییە، ئێمە ناو ناوەندەكانی خوێندنمان ئەوەندە ئامێری فێنككەرەوەمان نییە كە بكەوینە هاوین ناتوانیین لەو كاتەشدا درێژە بەخوێندن بدەین.

ڕوونیشیكردەوە، بەپێی ئەو پلانەی ئێستا هەیە، پێویستە تاكو 5-6 كۆتایی خوێندنی وەرزی یەكەم بێت لە 5-6 تاقیكردنەوەی كۆتایی وەرزی یەكەم دەست پێدەكات تا كۆتایی مانگی 6 ، هەروەها لە 4-9 خوێندنی وەرزی دووەمی ساڵی خوێندنی 2020-2021 دەستپێدەكەین.

جەختی لەوەش كردەوە، تاكو ئێستا هیچ بڕیارێك بۆ دەرچوونی گشتی نییە.