سەردێر

هەپەگە هەنگاوی “بازەكانی زاگرۆس”ی دەستپێكرد

خەڵك-
لەدژی هێرشەكانی سوپای توركیا بۆ سەر هەرێمەكانی پاراستنی مەدیا، هەپەگە هەنگاوی شۆڕشگێرانەی بازەكانی زاگرۆسی دەست پێكرد و ڕایدەگەیەنێت ، كە سەرەڕای بەكارهێنانی بۆمبی كیمیایی سوپا نەیتوانیوە پیشڕەوی بكات.

هێزەكانی پاراستنی گەل (هەپەگە) ئەمڕۆ یەك شەممە لە دژی ئەو هێرشانەی سوپای توركیا بۆ سەر هەرێمەكانی ئاڤاشین، مەتینا و زاپ دەستیپێكردووە، ڕاگەیەنراوێكی بڵاوكردەوە.

هەپەگە ڕایگەیاندووە، سوپای توركیا سەرەڕای بەكارهێنانی بۆمبی كیمیایی نەیتوانیوە پیشڕەوی بكات، تا ئێستاش دەیان سەربازیان كوژراون و برینداربوون.

ئاماژە بۆ ئەوەشكراوە، كە لە دژی هێرشەكانی سوپای توركیا بۆ سەر هەرێمەكانی پاراستنی مەدیا، هەنگاوی شۆڕشگێرانەی بازەكانی زاگرۆسی دەست پێكرد.

ماوەی دوو ڕۆژە سوپای توركیا بوردمانێكی چڕی ناوچەكانی چیای مەتین دەكات بە ئامانجی لێدانی بارەگاكانی پەكەكە و هێزی لە چەند شوێنێك دابەزاندووە، بەڵام بە وتەی چاودێرانی سیاسی، توركیا لەم هێرشەشی هاوشێوەی هێرشەكانی بۆ سەر چاری گارە تووشی شكستی گەورە دەبێت.

هیوا سەید سەلیم، ئەندامی مەكتەبی سیاسی حزبی زەحمەتكێشانی كوردستان بۆ (خەڵك) ئاماژەی بەوەكرد، شەڕی ئەو جارەی گەریلا و سوپای توركیا لە مەتین ئەگەرچی لە ڕووی ستراتیژیەوە سەختە، بەڵام توركیا مەبەستیەتی داگیری بكات تا بتوانێت باشوور و باكوور لێك داببڕێت.