سەردێر

مردووانی نەخۆشخانە سوتاوەكەی بەغدا گەیشتە 82 كەس

خەڵك-

بەپێی نوێترین ئامارەكان ژمارەی قوربانیانی سوتانی نەخۆشخانەی ئیبن خەتیب لە بەغدا گەیشتە 82 مردوو و دەیانی دیكەش بریندار بوون و ئامارەكە رەنگە بەرزتریش ببێتەوە.

بەیانی ئەمڕۆ یەك شەممە حكومەتی عێراق پرسەنامەی گشتی بۆ ماوەی 3 رۆژ راگەیاند بۆ گیانی قوربانیانی ئاگركەوتنەوەكەی شەوی رابردووی نەخۆشخانەی ئیبن خەتیبی بەغدا.

نوسینگەی راگەیاندنی مستەفا كازمی سەرۆك وەزیران رایگەیاند
سەرۆك وەزیران بڕیاریداوە بە راگەیاندنی پرسەی گشتی بۆ گیانی قوربانییەكان.

هاوكات كازمی فەرمانی كرد بە لێكۆڵینەوە لە رووداوی ئاگركەوتنەوە لە نەخۆشخانەی ئیبن خەتیب تایبەت بە نەخۆشی كۆرۆنا لە نیوە شەوی رابردوودا.

هاوكات كازمی فەرمانی كرد بە دەستگیركردنی بەڕێوەبەری گشتی نەخۆشخانەكە و بەڕێوەبەری ئاسایش و چاككردنەوەی دەزگاكانی نەخۆشخانەی ئیبن خەتیب بۆ لێكۆڵینەوە لە رووداوەكە و سزادانی بەرپرسیاران.

هاوكات رایگەیاند كۆچكردووان هەموو مافێكی شەهیدیان هەیە و دەوڵەتیش چارەسەری بریندار و سوتاوەكان دەكات لە دەرەوەی عێراق.