سەردێر

حزبە فەرمانڕەوا و ئۆپۆزسیۆنەكان “ئاین” بۆ بەلاڕێبردنی هاووڵاتیان بەكاردەهێنن

فەرمانڕەواكان رووداو دروست دەكەن و حزبە ئیسلامی و ئۆپۆزسیۆنەكانیش دەیكەنە كاڵای بانگەشەی هەڵبژاردن بە ناوی پارێزگاری لە دین و نەریت

 

خەڵك-

ماوەیەكە لە هەرێمی كوردستان كۆمەڵێك رووداو روو دەدەن هەندێك گومان دەكەن كە فەرمانڕەوایان لە پشت دروستكردنی ئەم رووداوانە بن، بۆ بەكارهێنانیان لە بەرژەوەندییەكانی خۆیان.

لە بەرامبەردا كاردانەوەی ئەم رووداوانەش لەلایەن هەندێك كەسی حزبە ئیسلامییەكانەوە جێگەی رەخنەیە كە بابەتەكان زۆر لە قەبارەی خۆیان گەورە دەكەن، خەڵكیان پێوە خەریك دەكەن، بانگەشەی توندوتیژی دەكەن، بۆیە هۆشداری دەدرێت لە بەردەوام بوونی ئەم رەوشە كە رەنگە ببێتەهۆی تێكدانی ئاشتی كۆمەڵایەتی و رووداوی نەخوازری لێ بكەوێتەوە.

شارەزایان  ئاماژە بەوە دەكەن حزبەكانی دەسەڵات بۆ بەرژەوەندی خۆیان رووداو دروست دەكەن، حزبە ئیسلامییەكان و حزبە ئۆپۆزسیۆنەكانی دیكە و چالاكەوانە سیاسیی و مەلاكاكانی نزیك لە ئەم حزبانە، ئەم رووداوانە دەقۆزنەوە بۆ بانگەشەكردن بۆ خۆیان بۆ ئەوەی لە كاتی خۆ هەڵبژاردن بۆ پەرلەمانتاری دەنگیان پێ بدرێت، خۆیان وەك بەرگریكاری ئاینی وێنا دەكەن لای خەڵك و لە رێی دینییەوە سۆزی خەڵك بۆ خۆیان رادەكێشن.

بۆیە داوا لە هاوڵاتیان دەكرێت هۆشیار بن لە بەرامبەر داوی حزبە فەرمانڕەواكان و هەم حزبە ئۆپۆزسیۆنەكانیش بە وریاییەوە مامەڵە لەگەڵ ئەم رووداوانەدا بكەن بۆ ئەوەی بە لاڕێدا نەبرێن.

مەسعود عەبدولخالق چاودێری سیاسی بە (خەڵك)ی ڕاگەیاند، ئەگەر گەندەڵی بەردەوام بێت ئاشتی كۆمەڵایەتی تێكدەدات، چونكە پڕۆسەی گەندەڵی پێویستی بە تێكدانی ئاشتی كۆمەڵایەتییە لە چەندین ڕووەوە.

وتیشی”گەندەڵی لە ڕووی ئابوورییەوە چینایەتی دروست دەكات كە بەهیچ شێوەیەك ئاشتی لەنێوان ئەو چینانە دروستنابێت، لەلایەكیترەوە بۆ ئەوەی تەمەنی گەندەڵی درێژ بێت دەبێت هیچ لایەنێكی یاسایی، نیشتمانی، كۆمەڵایەتی، زانستی بە سەلامەتی نەمێنێت، ئێستاش كۆتا قۆناغ گەیشتە بونیادی كۆمەڵایەتی، چونكە بونیادی كۆمەڵایەتی كوردستان بەناوبانگ بوو بەشێوەیەك قەڵغانێكی زۆر گەورە بوو بەرانبەر داگیركەران”.

ئاشكراشیكرد، ئێستا گەندەڵی لە كوردستان گەیشتووەتە ئەو ڕادەیەی كە خەریكە بە پڕۆگرام بابەتی كۆمەڵایەتی تێكبدات، چونكە پێویستییەكانی پڕۆسەی گەندەڵی ئەوەیە كە هەموو پیكهێنەرەكانی كۆمەڵگە تێكبدات بۆ ئەوەی تەمەنی خۆی درێژ بكات.