سەردێر

لە سلێمانی لە 10 ڕۆژی ڕەمەزاندا 211 شوێن سزادراون

سلێمانی ـ نزار جەزا
ئەمڕۆ شەممە قائیمقامیەتی سلێمانی ئاماری كار و چالاكییەكانی 10 ڕۆژی یەكەمی مانگی ڕەمەزانی خستەڕوو.

ئاوات محەمەد، قائیمقامی سلێمانی لەكۆنفڕانسێكی ڕۆژنامەوانیدا ڕایگەیاند، ئەم مانگەش هاوشێوەی مانگەكانی دیكە لیژنەكانیان بەردەوام سەردانی شوێنە جیاوازەكانیان كردووە و سەرپێچیكارانیان سزاداوە، بەڵام لەماوەی ڕەمەزاندا میدیاكان زیاتر ڕووماڵی كار و چالاكییەكانیان دەكەن و زیاتر تەركیز خراوەتە سەر خواردەمەنی، بۆیە وادەردەكەوێت سەرپێچییەكان زیادیكردووە.

ئاماژەی بەئەوەشدا، لەماوەی 10 ڕۆژی یەكەمی ڕەمەزاندا توانیویانە دوو هەزار و 814 سەردان بكەن، كە 211 سەرپێچییان تۆماركردوە.

باسی لەئەوەشكرد، هەر لەو ماوەیەدا 145 ئاگاداركردنەوەیان نووسیوە، 34 شوێنیان داخستووە، پێنج شوێنیان داوە بەدادگا.

ئەوەشی خستەڕوو، 34 تۆن خۆراكیان لەناوبردووە و بە بڕی 15 ملیۆن و 625 هەزار دینار غەرامەیان نووسیوە.