سەردێر

قائیمقامیەتی سلێمانی ئاگاداریەك بڵاودەكاتەوە

خەڵك
سەرۆكی لیژنە هاوبەشەكانی قائیمقامیەتی سلێمانی رایدەگەیەنێت، ئاوی لەدەبەنراو لە پلەی گەرمی بەرز و بەر تیشكی خۆر دابنرێت یان بەدانەپۆشراوی بگوازرێتەوە لیژنەكان شوێنەكە و شۆفێرەكە روبەڕوی رێكاری یاسایی توند دەكەنەوە.

لەشكر حەمید، سەرۆكی لیژنە هاوبەشەكانی قائیمقامیەتی سلێمانی ئەمڕۆ هەینی (2021.4.23) بە (خەڵك) ی رایگەیاند، پێشتر لەرێگەی سەردانی لیژنەكانەكانەوە دوكان، ماركێت، كۆگا و كارگەكانی ئاو، ئاگادار كراونەتەوە لە هەر شوێنێك‌ ئاوی لەدەبەنراو‌ لە پلەی گەرمی بەرز و بەر تیشكی خۆر دابنرێت یان لەكاتی گواستنەوەیدا دانەپۆشراو بێت قائیمقامیەتی سلێمانی شوێنەكە و شۆفێرەكەش‌ روبەڕوی رێكاری یاسایی توند دەكەنەوە.

وتیشی:”پێش ئەوەی ئاو بكرێتە ناو دەبە پلاستیكەكان، لە ‌بری كلۆر ‌مادەی ئۆزۆن بۆ خاوێنكردنەوەی دەبەكان بەكاردەهێنرێت، لەكاتی بەركەوتنی بەتیشكی خۆر، ئۆزۆنەكە شی دەبێتەوە بۆ ( O2) لەگەڵ ئۆكسجینێكی چالاك، (O2) بەبێ كێشە لەگەڵ ئاو تێكەڵ دەبێت، بەڵام مانەوەی یەك ئۆكسجین لەش توشی نەمانی بەرگری دەكات”.

ڕاشیگەیاند، كە بەرزبونەوەی پلەی گەرمی بۆ (25) پلەی سەدی،‌ بەشێكی پلاستیكەكە لەگەڵ ئاوی ناو دەبەكە‌‌ كارلێك دەكات دەبێتە هۆكاری سەرەكی بۆ توشبون بەنەخۆشی شێرپەنجه ‌و تێكچونی هۆرمۆنەكان بەتایبەت لەخانماندا.

ئاماژەی بۆ ئەوەكرد، قائیمقامیەتی سلێمانی نوسراوی ئاراستەی بەڕێوەبەرایەتی هاتوچۆی سلێمانی كردوە بۆ لێپرسینەوە لەو بارهەڵگرانەی ئاوی لەدەبەنراو بەدانەپۆشراوی دەگوازنەوە، هەروەها بەفەرمانی قائیمقامی سلێمانی هەر شوێنێك سەرپێچی بكات و ئاوی لەدەبەنراو لە پلەی گەرمی بەرز و بەرتیشكی خۆر دابنێت لەلایەن لیژنە هاوبەشەكانەوە شوێنەكە و خاوەنەكەشی روبەڕوی رێكاری یاسایی توند دەكرێتەوە.