سەردێر

هۆكاری زۆربوونی ڕێژەی تووشبوون بە كۆرۆنا ئاشكرا دەكرێت

خەڵك-
ئەندامێكی تیمی ڕۆژنامەوانی پزیشكی لە وەزەتی تەندروستی عیراق ڕایدەگەیەنێت، پابەندنەبوونی هاووڵاتیان بە ڕێكارەكانی خۆپارێزی و دووركەوتنەوەی كۆمەڵایەتی، بونەتە مایەی زیادبوونی ژمارەی تووشبوون و گەیشتن بە ملیۆنێك تووشبوو لە نێوخۆی عیراق.

ئەمڕۆ پێنج شەممە، ڕوبا فەلاح ئەندامی تیمی ڕۆژنامەوانی پزیشكی لە وەزەتی تەندروستی عیراق ڕایگەیاند”وەزارەتی تەندروستی هەفتانە وەجبەكانی ڤاكسینی كۆرۆنای پێدەگات، تاكە چارەسەر و شیاوترین بۆ كەمكردنەوەی ژمارەی تووشبوان، پابەندبوونە بە ڕێكارەكانی خۆپارێزی و دووركەوتنەوەی كۆمەڵایەتی و وەرگرتنی ڤاكسین”.

ڕوبا ئاماژەی بە فەراهەمبوونی سێ‌ جۆر ڤاكسین كرد كە بریتین لە ڤاكسینەكانی (فایزەر، ئەسترازنیكا، سینۆفارم)،جەختیشی لەسەر پێویستی هۆشیاركردنەوەی هاوولاتیان كردەوە لەبارەی كاریگەریی ڤاكسینەكان كە لەلایەن ڕێكخراوی تەندروستی جیهانییەوە پەسەندكراون.

وەزارەتی تەندروستی عیراق لەگەڵ ئەوەی ڤاكسینەكان بە خۆڕایی و دابەش دەكات، بە “دڵنیابەخش و كاریگەر و مۆڵەتپێدراو” وەسفیان دەكات.
ئەمڕۆ پێنج شەممە، وەزارەتی تەندروستی عیراق تۆماركردنی 8450 حاڵەتی نوێی تووشبوون بە ڤایرۆسی كۆرۆنا، و 6872 حاڵەتی چاكبوونەوە، و 30 حاڵەتی گیانلەدەستدانی بەهۆی پەتاكەوە ڕاگەیاند.