سەردێر

میدیای كوردی هێشتا بەدرخانییەكانی تێنەپەڕاندووە

مامۆستایەكی راگەیاندن: بە پارەی خەڵك سەدان سایت و هەزاران پەیج و ئەكاونت بۆ جنێودان دروست كراوە

خەڵك

ئەمڕۆ ساڵڕۆژی ڕۆژنامەگەری كوردییە و مامۆستایەكی زانكۆش دەڵێت، میدیای كوردی تا ئێستا نەیتوانیوە بەدرخانییەكان تێپەڕێنێت و دەشڵێت میدیای كوردی پاشاگەردانی و شەڕە جنێو دروست دەكات.

كامیل عومەر، مامۆستای ڕاگەیاندن لە زانكۆی سلێمانی بە (خەڵك)ی ڕاگەیاند، ڕۆژنامەوانی ئێمە بەداخەوە تا ئێستا نەیتوانیوە بەو پێشكەوتن و گۆڕانكارییە زۆرەی تەكنەلۆژیای ئێستا، بەدرخانییەكان تێبپەڕێنێت لە ساڵی 1898 یەكەم ژمارەی ڕۆژنامەی كوردستانیان دەركرد كە بووەتە مێژووی ڕۆژنامەگەری و لە تاراوگەوە توانیان مێژوو بۆ كورد و كوردستان بنوسنەوە.

وتیشی: ڕۆژنامەوانی ئێستا جۆرێكە لە پاشاگەردانی و بێسەر و بەرەیی و شەڕە قسەو جنێو دروست دەكات و تەواوی بەهاو ڕەوشتەكانی لە كۆمەڵگەدا داڕماندووە.

ئەو مامۆستایە دەشڵێت، بە پارەی نیشتیمان و خەڵك سەدان سایت و هەزاران پەیج و ئەكاونتی سێبەریان دروست كردووە بۆ جنێودان و هەتا كەناڵە ئاسمانییە گەورەكانیش كە پارەیەكی خەیاڵیان تێدا خەرجدەكرێت لە پێناوی ئامانجێكی سیاسی و تێكشكاندنی بەهاكانی كۆمەڵگەدا كار دەكەن كە بە ئەنجامێك گەیشتووین بڵێین ئەگەر میدیای كوردی نەبێت خەڵك لە ئارامیدا دەژی.

دەشڵێت: دەسەڵات و حزبە سیاسییەكان بە ئامانجی ناشرینكردنی یەكتری گۆمێكی لێڵیان لە میدیای كوردیدا دروستكردووە .

“هیچ حسابێك بۆ كەسانی ئەكادیمی ناكرێت”

سەبارەت بە شێوازی ڕووماڵكردنی ڕووداوەكان لە لایەن میدیاكارانەوە، كامیل عومەر وتی: ئێمە لە بەشی راگەیاندن وانەیەكی تایبەتمان هەیە بە ئیتیك و یاساو تێیدا باس لەوە دەكەین كە ئەمەی ئێستا لەنێو میدیای كوردیدا هەیە پێشێلكارییە و ناشیرینكردنی بەهاكانی كۆمەڵگەیە و بە نموونەی زیندوو بۆیان ڕووندەكەینەوە كە چۆن میدیای كوردی دەستێوەردان دەكات لەنێو ژیانی تایبەتی تاكەكان و ڕێڕەوی كاری دادگاكان و ڕۆڵی دادگا دەبینێت، خەڵك هان دەدات بۆ توندووتیژی.

وتیشی، بەڵام بەداخەوە كاتێك خوێندكاران دەچنە نێو دەزگاكان گوێیان لێناگیرێت و دەبێت بە ئاڕاستەی بەڕێوەبەری دەزگاكە كاری ڕۆژنامەگەری بكەن كە ئامانجی سیاسی و ناشەریفانەیان هەیە و لە ململانێدان و هیچ حسابێك بۆ كەسانی ئەكادیمی ناكرێت.

“بڕیارەكەی پەرلەمان هیچ لە دۆخی ئازادی ڕۆژنامەگەری ناگۆڕێت”

دوێنێ‌ لە پەرلەمانی كوردستان بە دەنگی 101 پەرلەمانتار، رۆژی 22ی نیسانی هەمو ساڵێكی وەك رۆژنامەگەری كوردی پەسەندكرا، سەبارەت بەوەی ئەم بڕیارە چی لە دۆخی ڕۆژنامەوانی كوردی دەگۆڕێت كامیل عومەر وتی: پەرلەمانی كوردستان تەنها خەریكی وشەكاری و بەروارو كۆمەڵێك شتی لاوەكییە و ئەو بڕیارە هیچ پەیوەندییەكی بە دۆخی خراپی ئازادی ڕاگەیاندن نییە كە ئێستا چەندین كەس لەسەر لایك و كۆمێنت لە زیندانەكاندا بەند كراون و بە ناڕەوا ستەمیان لێكراوەو حوكمدراون دەبوو پەرلەمان بۆ ئەم دۆخە قسەی هەبوایە.

“ڕۆژەكە هەڵەیە”

ئەو مامۆستایە دەشڵێت، زۆر بێئاگاییانە ئەو بڕیارە دراوە، چونكە مێژووی ڕۆژنامەگەری كوردی 21 ی نیسانی 1898 ە كە چەند توێژەرێكی ئەكادیمی لە بەدواداچونێكی وورد دا سەلماندیان، پەرلەمان هاتووە پەسەندی ئەو بەروارە دەكات كە هەڵەیە و هیچ لە دۆخی ئازادی ڕۆژنامەگەری ناگۆڕێت و كاری پەرلەمانیش نییە ئەوە دیاریكات.