سەردێر

قائیمقامی سلێمانی: بەرامبەر پاراستنی تەندروستی گشتی خۆمان بە بەرپرسیار دەزانین

خەڵك-
قائیمقامی سلێمانی ڕایدەگەیەنێت: بەرامبەر پاراستنی تەندروستی گشتی قائیمقامیەتی سلێمانی خۆی بەبەرپرسیار دەزانێت و لە ڕێگەی لیژنەكانییەوە و بەپێی پسپۆڕی ئەندامەكان بەدواداچون بۆ ئەو كاڵاوشمەك و خواردەمەنیانە دەكەن ڕۆژانە هاولۆاتییان بەكاریدەهێنن.

ئاوات محەمەد، قائیمقامی سلێمانی لە كۆبونەوەی ڕۆژانەی خۆی لەگەڵ لیژنەی باڵای لیژنە هاوبەشەكانی قائیمقامیەتی سلێمانی ڕایگەیاند، كاری ڕۆژانەی لیژنەكان بەدواداچونە بۆ ئەو كاڵا و شمەك و خواردەمەنیانەی ڕۆژانە لەلایەن دوكاندار و بازرگانەكانەوە بەهاووڵاتیان دەفرۆشرێت و ڕێگری كردنە لە سەرپێچییەكان و پابەندكردنی شوێنەكانە بە مەرجەكانی تەندروستی و ڤێتێرنەری و ڕێنماییەكانی دیكەی كاركردن و هەروەها جێبەجێكردنی ڕێكارەكانی خۆپارێزییە.

وتیشی، “قائیمقامیەتی سلێمانی بەرامبەر بە تەندروستی گشتی و پاراستنی تەندروستی هاووڵاتیان خۆی بەبەرپرسیار دەزانێت” و جەختیشی كردەوە، پێوستە سەرجەم شوێنكارەكان پابەندی مەرج و ڕێنماییەكانی كاركردن بن، بەپێچەوانەوە سەرپێچیكاران ڕوبەڕوی رێكاری یاسایی دەكرێنەوە.

قائیمقامی سلێمانی ئەوەی ڕوونكردەوە، مەبەست لە داخستنی شوێنكارەكان لەلایەن لیژنە هاوبەشەكانەوە زیان گەیاندن نییە بە كار و بازاڕی هیچ كەسێك، بڵاوكردنەوەی لە ڕاگەیاندنەكانیشەوە پەیامە بۆ شوێنەكان كە پابەندبن، هەروەها بۆ هاووڵاتیان زیاتر چاوكراوەبن و بە وریاییەكی زیاترەوە كاڵا و شمەكەكانیان بكڕن و لە كاتی هەبوونی گومان و بەدیكردنی كاڵا و شمەكی خراپ و ماوەبەسەرچوو لیژنەكانی قائیمقامیەتی سلێمانی ئاگادار بكەنەوە.

ڕاشیگەیاند، لە هەڵمەتەكانیاندا لیژنەكان بە هاوكاری هێزە ئەمنییەكانی سلێمانی سەردانی هەموو شوێنێكی دوكان و بازاڕ و شوێنە گشتییەكانی سلێمانی و ناحیەكانی بازیان، تانجەرۆ و بەكرەجۆ دەكەن، لەكاتی هەبونی سەرپێچی شوێنەكە ڕوبەڕوی ڕێكاری یاسایی دەكرێتەوە.

ئاماژەی بۆ ئەوەشكرد، بەپێی ئەو ڕاپۆرتانەی لەلایەن لیژنەكانەوە ئاِراستەی قائیمقامیەتی سلێمانی دەكرێن، بەشێكی زۆری شوێنەكان پابەندن بە مەرجەكانی كاركردن، تەنها ئەو شوێنانە نەبێت، كە ڕوبەڕوی ڕێكارە یاساییەكان دەكرێنەوە و دادەخرێن، كە ئەوەش لەپێناوی پاراستنی تەندروستی گشتییە.

ئاوات محەمەد، قائیمقامی سلێمانی سوپاسی هاووڵاتیانی شاری سلێمانی كرد، كە بەشێوەیەكی بەردەوام هاوكاری و پشتیوانی لیژنە هاوبەشەكان دەكەن، بە پێدانی زانیاری لەسەر ئەو كەسانەی سەرپێچی دەكەن.

وەك قائیمقامیەتی سلێمانی لە ڕاگەیەنراوەكەیدا بڵاویكردۆتەوە، لەكاتی هەبوونی سكاڵا یان پێدانی زانیاری بە قائیمقامیەتی سلێمانی و لیژنە هاوبەشەكان پەیوەندی بە ژمارە مۆبایلی (07708677777)ـەوە بكەن.