سەردێر

لە قامشلۆ شەڕ بەردەوامە و كوژراو و بریندار هەیە

خەڵك-

بەهۆی ناكۆكی نێوان چەند هێزێكی نزیك لەحكومەتی سوریاو هێزەكانی ئاسایشی ڕۆژئاوای كوردستان شەش كەس گیانیانلەدەستداوەو ژمارەیەكیش بریندارن.

بەپێی زانیارییەكان، كاتژمێر 10ی شەوی ڕابردوو، چەكدارانی هێزەكانی بەرگری نیشتیمانی سوریا هێرشیان كردەسەر خاڵێكی پشكنینی هێزەكانی ئاسایش لە شاری قامشلۆی ڕۆژئاوای كوردستان و شەڕ لە نێوان هەردوولا دەستیپێكرد و شەڕەكەش تاكو ئێستا بەردەوامە.

هەر بە پێی زانیارییەكان، بەهۆی شەڕەكەوە پێنج چەكداری هێزەكانی سەر بە حكومەتی سوریا كوژراون و هاوكات ئەندامێكی ئاسایشی ڕۆژئاواش كوژراوە و چەندین كەسیش بریندار بوون.

لای خۆشییەوە ئاسایشی ڕۆژئاوای كوردستان لە ڕاگەیەندراوێكدا ئاماژە بۆ ئەوە دەكات، گرووپی بەرگریی نیشتمانی هێرشەكەیان ئەنجامداوە و ئەوانیش وەڵامی هێرشەكەیان داوەتەوە.
ئاشكراشیكرد، لە هیچ یەكێك لەو خاڵانەی كە هێڵی بەریەككەوتنە لەگەڵ هێزەكانی حكومەتی سوریا كە جیا لەو شوێنەی ئێستا شەڕی لێیە، شەڕو پێكدادان ڕووینەداوە، واتە هێزەكانی حكومەتی سوریا لەو شەڕە تاوەكو ئێستا دەستووەردانیان نەكردووە و بەرەی دیكەی شەڕیان لەگەڵ هێزەكانی بەڕێوەبەرایەتی خۆسەر نەكردووەتەوە.