سەردێر

ووردەكاری چۆنێتی جێبەجێكردنی یاسای چاكسازی لە وەزارەتی شەهیدان

ڕاپۆرتی دووەمی حكومەت پەیوەست بە جێبەجێكردنی یاسای چاكسازی ئاڕاستەی پەڕلەمان دەكرێت

خەڵك

وەزیری كاروباری شەهیدان و ئەنفالكراوانی هەرێمی كوردستان ڕایدەگەیەنێت، لەبابەتی یاسای چاكسازی هێندەی چاوم لە دادپەروەرییە، ئەوەندە چاوم لەسەر گێڕانەوەی پارە نییە.

عەبدوڵڵا حاجی مەحمود وەزیری كاروباری شەهیدان و ئەنفالكراوانی هەرێمی كوردستان بە ئانادۆڵی ڕاگەیاند، یاسای چاكسازی لە كابینەی پێشووی حكومەتی هەرێم كاری لەسەر كرا، بەڵام یەكلایی نەكرایەوە، لەم كابینەیەدا پەڕلەمانی كوردستان یاساكەی پەسەندكردو حكومەتی هەرێمیش ڕێنمایی بۆ جێبەجێكردنی دەركرد.
وتیشی”پەیوەست بە وەزارەتی شەهیدان و ئەنفالكراوان كە یەكێكە لەو وەزارەتانەی بەشدارە لە چاكسازییەكەدا، ڕێنماییمان دەركردووە بۆ ئەو بەشانەی پەیوەستە بە وەزارەتەكەمانەوە، پرسی شەهیدان بە سێ ئاڕاستەدا، شەهیدی سەنگەر و شەهیدانی جینۆساید و شەهیدی هاووڵاتی، جگە لەوەش تاقانەكانی جینۆساید و ئەنفال، بەركەوتەكانی چەكی كیمیایی، پێداچوونەوە بە زیندانیانی سیاسی و كۆمەڵێك بابەتی دیكەش هەن لەناو كۆی گشتی یاسای چاكسازیدا كە ئێمەش دەگرێتەوە”.

ئاشكراشیكرد، بۆ جێبەجێكردنی یاساكە لیژنەی باڵای چاكسازی هەیە و وەك وەزیری شەهیدان ئەندامم تیایدا، لەهەمانكاتدا سەرپەرشتیاری پڕۆسەی چاكسازی وەزارەتی كاروباری شەهیدان و ئەنفالكراوانیشم.

ڕوونیشیكردەوە، ڕاپۆرتی دووەمی حكومەتی هەرێم پەیوەست بە جێبەجێكردنی یاسای چاكسازی لەم هەفتەیەدا ئاڕاستەی پەڕلەمان دەكرێت، پەیوەست بە وەزارەتەكەی ئێمە و داتای تێدایە و بە ژمارە كارەكان ڕوونكراوەتەوە.

سەبارەت بە ڕێگرییەكانی بەردەمی بۆ جێبەجێكردنی یاساكە، ناوبراو ڕایگەیاند، سەرۆكی حكومەت و كابینەی حكومەت بەجددی پشتیوانی لە یاسای چاكسازی دەكەن، بۆیە هیچ ڕێگرییەك نییە لەبەردەم مندا بۆ ڕاگرتنی جێبەجێكردنی یاسای چاكسازی، تەنیا بۆخۆم وەك وەزیر كار لەسەر ئەوە دەكەم و چاوم لەسەر ئەوەیە شتێك نەكەم نادادپەروەری بێت.