سەردێر

بارەگای بارزانی؛ لاى مەسعود بارزانی خوێنی شەهیدان و سەنگەری پێشمەرگە مەرجەعن

خەڵك
بارەگای بارزانی ڕایدەگەیەنێت، مەسعود بارزانی فەرمانی بە ڕاگەیاندن و میدیاكانی پارتی كردووە، كە پێویستە لەچالاكی و كاری ڕاگەیاندندا ڕەچاوی بەها و پڕەنسیپ و بنەماكانی ڕەوشتبەرزی بكرێت ، دەشڵێت،”بەلای مەسعود بارزانییەوە خوێنی شەهیدان و سەنگەری پێشمەرگە مەرجەعن”.
بارەگای بارزانی لە ڕاگەیەنراوێكدا بڵاویكردەوە، مەسعود بارزانی پێشتر و ئێستا و لە داهاتووشدا خۆی بە پێشمەرگە دەزانێت و پێشمەرگایەتی لە سەرووی هەموو جۆرە پێناسە و پلە و پایە و بە گەورەترین شانازی دادەنێت.
ڕاشیگەیاندووە، كە بەلای مەسعود بارزانییەوە خوێنی شەهیدان و سەنگەری پێشمەرگە مەرجەعن بۆ هەموو خاوەن قەزییە و نیشتیمانپەروەر و وڵاتپارێزانی كوردستان.
ڕاگەیێندراوێك بۆ ڕای گشتی
لەبارەی دیاردەی نامەقبووڵی جنێودان و بەكارهێنانی زمانی زبر لە ڕاگەیاندن و تۆڕە كۆمەڵایەتییەكان كە بە داخەوە ماوەیەكە لەنێوان لایەنە سیاسییەكاندا لە ئارادایە، سەرۆك بارزانی فەرمانی بە ڕاگەیاندن و میدیاكانی پارتی دیموكراتی كوردستان كردووە كە پێویستە لە چاڵاكی و كاری ڕاگەیاندندا ڕەچاوی بەها و پڕەنسیپ و بنەماكانی ڕەوشتبەرزی بكرێت و ئامانجی سەرەكیی پاراستنی بەرژەوەندییەكانی گەلی كوردستان بێت. هەر بەپێی ئەو فەرمانە هەر ئۆرگانێكی پارتی پابەندی بەها و ئامانجەكانی پارتی و پڕەنسیپە گشتییەكان نەبێت ئیجرائاتی لەگەڵدا دەكرێت.
هەر لێرەشدا ڕایدەگەیێنین كە سەرۆك بارزانی، پێشتر و ئێستا و لە داهاتووشدا خۆی بە پێشمەرگە دەزانێت و، پێشمەرگایەتی لە سەرووی هەموو جۆرە پێناسە و پلە و پایە و، بە گەورەترین شانازی دادەنێت. بەلای سەرۆك بارزانییەوە خوێنی شەهیدان و سەنگەری پێشمەرگە مەرجەعن بۆ هەموو خاوەن قەزییە و نیشتیمانپەروەر و وڵاتپارێزانی كوردستان.
ڕاگەیاندنی بارەگای بارزانی
٢٠ـی نیسانی ٢٠٢١