سەردێر

داوایەك ئاڕاستەی مەسعود بارزانی و بافڵ تاڵەبانی و شێخ لاهور دەكرێت

خەڵك-
سەنتەری میترۆ بۆ داكۆكی لە مافی ڕۆژنامەنووسان پەیامێك ئاڕاستەی سەرۆكی پارتی دیموكراتی كوردستان و هاوسەرۆكانی یەكێتیی نیشتمانی كوردستان دەكات و داوایان لێ‌ دەكات، “كاربكەن بۆ كۆتایهێنان بەو هێرش و ناوزراندنەی میدیای سێبەری هەردوو حزب” و ڕێكخراوی چمك-یش دەڵێت: “پێویستە دەستبەجێ دەست لەو شەڕە میدیاییە ھەڵگرن”.

سەنتەری میترۆ لە نووسراوێكدا، كە ئاڕاستەی مەسعود بارزانی و بافڵ تاڵەبانی و لاهور شێخ جەنگی كردووە ئاماژەی بەوەكردووە، رەنگە ئەم شەرە بۆ ماوەیەكی كاتی لە بەرژەوەندی حزبەكانتان بشكێتەوە، بەڵام بە شێوەیكی بەردەوام لە بەرژەوەندی نەیاری كوردستان و ئەزمونەكەی شكاوەتەوە.

دەشڵێت: “داواتان لێدەكەین بە قوڵی وجوان بیری لێبكەنەوە، ئێستا لەدەستی خۆتاندایە، پەرۆشی بنوێنن بەر لەوەی بە تەواوەتی بترازێ، لەدەستی خۆتان دەربچێت”.

لای خۆشیەوە، ڕێکخراوی چاودێریی میدیای کوردی (چمک) لە ڕاگەیەنراوێكدا ئاماژەی بەوەكردووە، پەیام و گوتاری میدیایی؛ دەبێت ھەڵگری خەم و بەرژەوەندییە گشتییەکانی کوردستانیان بێت، نەک خراپ بەکارھێنانی میدیا و خزمەتگوزارییە جۆربەجۆرەکانی بۆ دەستوەردانە نێو مافی تایبەتمەندێتیی و ژیانی تایبەتیی کەسەکان. لەھەر پلە و پۆست و پێگەیەکدا بن.

ئاماژەی بەوەشكردووە، پێویستە دەستبەجێ دەست لەو شەڕە میدیاییە ھەڵگرن و لەوە زیاتر نەبنە «ئاگری بن کا»ی شەڕێکی دیکەی نێوان ھێزە کوردییەکان. ھاوکات پێویستە پەرلەمانی کوردستان و وەزارەتی رۆشنبیریی و لاوانی ھەرێمی کوردستان رۆڵی یاسایی و پیشەیی خۆیان ببینن و سنورێک بۆ خراپ بەکارھێنانی میدیای کوردیی و پەیامەکانیان دابنێن.

دەقی پەیامەكەی میترۆ:

بەرێز: سەرۆكی پارتی دیموكراتی كوردستان
بەرێزان: هاوسەرۆكانی یەكێتی نیشتمانی كوردستان
سەنتەری میترۆ داواتان لێدەكات پاڵپشت بە بەرپرسیارێتی حزبی و نیشتمانیتان، كاربكەن بۆ كۆتایهێنان بەو هێرش و ناوزراندنەی میدیای سێبەری هەردوو حزبتان بە پارەی سیاسی برەوی پێدەدەن و یادەوەری گشتی گەراندۆتەوە بۆ سەردەمی شەڕی ناوخۆ.
بەرێزان :
سەنتەری میترۆ دەیان پەیوەندی و داواكاری لە لایەن هاوڵاتیان، كەسایەتی نیشتنمانپەروەری ئەكادیمی، مافناس، چالاكوان، قوتابیان، وەزشەوان، كاسبكار، داكۆیكاری مافی ژنان، ژنی ماڵ، جوتیاران، پێگەیشتووە داوامان لێدەكەن بجوڵێین، فشار بكەین بە ئاراستەی كۆتایهێنان بە دیاردەی ناوزڕاندن و چەواشەكاری كە هاوڵاتییانی تینوو بۆ گۆرانكاری بێزاركردووە، لە بری مژدەی ئاشتەوایی، میدیای بەكرێگیراو بە پارەی سیاسییەكان، دەروونی ماندوویانی هێندەی تر ماندوو كردوە.
خەڵكی پەرۆش بۆ ئاشتی كۆمەڵایەتی، لایەنگرانی ململانێی سیاسی مەدەنی و شارستانین، نەك پەنابردن بۆ هەڵمەتی میدیای ئاستنزم و هەوڵی یەكترخستن و لەكەداركردنی كەسێتی و كەرامەتی مرۆیی، كە بە درۆی ئەو دەزگایانە و بەدروای سیاسی بە شێوەیەكی كارا برەوی پێدەدرێت.
داواتان لێدەكەین بگەرێنەوە بۆ پرنسیپەكانی ململانێی سیاسی مەدەنی و شارستانی، دڵنیابن لەوەی ئەو شێوازە لە بەكارهێنانی میدیا، زیان دەگەیەنێت بە كوردستان، حزبەكانتان، كاری میدیای پیشەیی.
بەرێزان:
سەنتەری میترۆ بەدرككردنی بەو مەتەرسییە گەورانەی كە لە ئەنجامی شەری نارەوای میدیای هاتۆتە ئاراوە، لە پەرۆشی بۆ ئاشتی كوردستان، بەجدی سەرنجتان بۆ ئەوە رادەكێشین، رەنگە ئەم شەرە بۆ ماوەیەكی كاتی لە بەرژەوەندی حزبەكانتان بشكێتەوە، بەڵام بە شێوەیكی بەردەوام لە بەرژەوەندی نەیاری كوردستان و ئەزمونەكەی شكاوەتەوە، زەمینەیش خۆش دەكات، لە قۆناغێكی تردا هەمان ئامرازی میدیایی هێزی بزوێنەری، بچنە خزمەتی نەیارو تینوو بۆ تێكدانی ئاشتی كۆمەڵایەتی.
داواتان لێدەكەین بە قوڵی وجوان بیری لێبكەنەوە، ئێستا لەدەستی خۆتاندایە، پەرۆشی بنوێنن بەر لەوەی بە تەواوەتی بترازێ، لەدەستی خۆتان دەربچێت.