سەردێر

بەرەنگاربوونەوەی دایناسۆرەكانی گەندەڵی لە عێراق

سەرمایەدارێكی گەورەی عێراقی دەستگیركرا

خەڵك-

سەرچاوە عێراقییەكان باس لەوە دەكەن هەڵمەتێكی گەورە دژی گەندەڵی دەستپێدەكات بەپێی پلانێكی حكومەتی عێراق كە چەند مانگێكە دەستی پێكردووە و رۆژی شەممە سەركردەی سیاسی و سەرمایەداری ناسراو جەمال كەربوولی دەستگیركرا.

ئەحمەد جاسم رۆژنامەوانی عێراقی رایگەیاند، بەڕێوەبەرانی گشتی لە وەزارەتەكانی پیشەسازی و چاندن و بازرگانی و دیوانی وەقفی شیعە هەن و لێكۆڵینەوەیان لەگەڵ دەكرێـت لەسەر گەندەڵی.

ناوبراو ئاماژەی بە هیچ ناوێك نەكرد، بەڵام ئاماژەی بە ئەوە كرد كە حكومەتی عێراق هەڵمەتی دەستپێكردووە بۆ دادگایی كردنی تۆمەتبارانی گەندەڵی كە بە دایناسۆرەكانی گەندەڵی نێویاد دەبرێت، كە لە بەڕێوەبەری گشتی خانەنشینییەوە دەستیپێكرد و گەیشتە جەمال كەربوولی.

ئاژانسی مربد لە زاری یوسف كیلابی ئەندامی پەرلەمانی عێراقەوە بڵاویكردەوە فەرمانی دەستگیركردن بۆ ژمارەیەك بەرپرس لە مانگی ئاداردا دەرچووە كە ئەندامانی پەرلەمان لە خولی ئێستا و رابردوودا، وەزیری پێشوو، بریكاری پێشووی وەزیری تێدایە.

سەرچاوەیەك لە وەزارەتی نێوخۆی عێراق رایگەیاند كەسانی خاوەن پلەی نێوەند و بەرز لەنێو دەستگیركراوەكاندا هەن كە گەندەڵییان كراوە.

سەرچاوەیەك بۆ كەناڵی الحرەی ئەمریكایی رایگەیاند دەزگای هەواڵگری عێراق بەشداری دەكات لە لێكۆڵینەوەكان كە ئەحمەد ئەبو رغیف سەركردایەتی دەكات.

بەپێی زانیارییەكان دەستگیركردنی جەمال كەربوولی كە سەركردەی حزبی حەلیشە، پەیوەندی بە ناكۆكی نێوان سوونەكان خۆشیانەوە هەیە بەتایبەت لە نێوان باڵی كەربوولی و باڵی محەمەد حەلبووسی سەرۆكی پەرلەمان.