سەردێر

دوو پڕۆژە یاسا لەسەر خۆبەخشەكان و ژینگە دەدرێتە پەڕلەمانی كوردستان

خەڵك-
بەمەبەستی سنورداركردن و بەرهەمهێنانی كەرەستە پلاستیكییەكان و ڕێكخستنەوەی كاری كارمەندانی خۆبەخش لە باشوری كوردستان، ڕێكخراوی سروشتی كوردستان هەستا بە پێشكەشكردنی دوو پڕۆژە یاسای ژینگەیی بە فراكسیۆنەكانی كوردستان.

سەروەر قەرەداغی، هاوسەرۆكی ڕێكخراوی سروشتی كوردستان، لە كۆنگرەیەكی ڕۆژنامەوانیدا ڕایگەیاند، ڕۆژانە 7 هەزار تۆن پاشماوە فڕێ‌ دەدرێت، كە ٣٥٪ی ئەو پاشەڕۆیانە پاشەڕۆی پلاستیكین.

سەبارەت بە ئەو پڕۆژە یاسایانە وتی، “ئامانجمان لە پڕۆژەكە سنورداركردنی كەرەستە پلاستیكییەكان و پاراستنی ژینگەیە لە پیسبوون بە كەرەستە پلاستیكییەكان، هەروەها پاراستنی ژیان و تەندروستی مرۆڤ و زیندەوەرانە لە زیانەكانی كەرەستە پلاستیكییەكان”.

وتیشی، “لەو پڕۆژەیەدا گرنگی بە باج خستنە سەر كەرەستە پلاستیكییەكان دراوە لەلایەن وەزارەتەوە بۆ ناوخۆی هەرێمی كوردستان بەڕێژەی %١٠٠، هەروەها دانانی باج لەسەر ئەو كارگانەی لەناوخۆدا كەرەستەی پلاستیكی بەرهەم دەهێنن بەڕێژەی ٧٥٪”.

ڕوونیشی كردەوە، هەر لە پڕۆژە یاساكەدا باس لە قەدەغەی بەكارهێنانی هەموو جۆرە كیسی نایلۆن كراوە لە سەمونخانە و نانەواخانەكان و بەكارهێنانی تورەكەی خام لەبەرامبەردا، لەگەڵ قەدەغەكردنی ماددە پلاستیكییەكان لە چێشتخانە و كافتریاكاندا و بەكارهێنانی كەرەستەی شوشە وەك جێگرەوە.

ئاماژەی بەوەشكرد، سزا بۆ سەرپێچیكەرانی یاساكە دانراوە بە سزای مادیی و زیندانیكردن، كە لەمانگێك كەمتر نەبێ و لە ساڵێك زیاتر نەبێت، لەگەڵ غەرامەكردن لە دوو ملیۆن كەمتر نەبێت و لە ١٠ ملیۆنیش زیاتر نەبێت”.

سەبارەت بە پڕۆژە یاسای دووەم، سەروەر قەرەداغی وتی، “لەلایەن ڕێكخراوەكەوە پڕۆژەی كاری خۆبەخشی-ش، پێشكەش بە پەڕلەمان كراوە، كە تیایدا داوای ڕێكخستنەوەی یاسای كاری خۆبەخشی و پاراستنی مافی خۆبەخشان دەكات”.