سەردێر

سەربازێكی ئێرانی كوژرا و پێشمەرگەیەكی كۆمەڵەش لە سلێمانی بێ سەروشوێنە

خەڵك-

حزبی دیموكراتی كوردستانی ئێران لە هێرشێكدا سەربازێكی سوپای پاسدارانیان كوشت.

ڕێكخراوی مافی مرۆڤی هەنگاو لە ڕاگەیەنراوێكدا ئاماژە بۆ ئەوە دەكات، ئێوارەی دوێنێ هەینی ١٦ی نیسانی ٢٠٢١، گرووپی هەڵۆكانی زاگرۆس لە رێگای گوندی”زیویە”ی سەر بە پیرانشار، ئۆتۆمبێلێكیان دایەبەر دەستڕێژی گوللە و سەرنشینی ئۆتۆمبێلەكە كوژرا.

ئاشكراشیكرد، ئەو كەسە ناوی “عوسمان حاجی حوسێنی” و خەڵكی پیرانشارە و ماوەی ١٧ ساڵە ئەندامی سوپای پاسدارانە و تەرمی ناوبراو گوازراوەتەوە بۆ نەخۆشخانەی پیرانشار.

بەپێی زانیارییەكان، گرووپی هەڵۆكانی زاگرۆس، گرووپێكی سەربازی نزیك لە حیزبی دیموكراتی كوردستانی ئێرانە و لەناو شارەكانی كوردستان چالاكی دەكەن.

هاوكات پێشمەرگەیەكی كۆمەڵەی شۆڕشگێڕی زەحمەتكێشی كوردستانی ئێران، لە ڕۆژی سێ شەممەی ڕابردووەوە لە شاری سلێمانی بێ سەروشوێنە.

بەپێی زانیارییەكانی ڕێكخراوەكە ئەو پێشمەرگەیە بە ئۆتۆمبێلێكی حیزبی چۆتە دەرەوەی بنكەكانی حیزبەكەی و لە نزیك سلێمانی و بێ سەروشوێن بووە.

هاوكات كۆمەڵەی شۆڕشگێڕی زەحمەتكێشانی كوردستانی ئێران، سەرەڕای چەند ڕۆژێك لە بێ سەروشوێن بوونی ئەو پێشمەرگەیان تا ئیستا هیچ لێدوانێكی فەرمییان نەداوە و ئەندامێكی ئەو حیزبەش ڕاگەیاند، چاوەڕیی وەڵامی ئیدارەی ئاسایشی سلێمانی دەكەن، بۆیە تا ئیستا هیچ لێدوانێكییان لەمبارەوە نەداوە.