سەردێر

هێرشەكانی باشیك و هەولێر پەیامی ئێرانییەكان بوو

خەڵك-

ئەیاد دلێمی شرۆڤەكاری سیاسی عێراقی رایگەیاند هێرشەكانی سەر
هەولێر پەیامێكی ئێران بوو.

شرۆڤەكارە عێراقییەكە بۆ كەناڵی الحرەی ئەمریكایی دەڵێت: گرووپە چەكدارەكانی سەر بە ئێران هەوڵ دەدەن بە ئەمریكایی و ئیسرائیلییەكان و دەوڵەتانی عەرەبی بڵێن، دەستیان درێژە بۆ سەر دامەزراوەكان جا ئەمریكایی بن نا ئەمریكایی.

دەشڵێت: ئەم هێرشانە بەشێوەیەكی گشتی نەبووە بەهۆی كەوتنەوەی زیانی مرۆیی بەشێوەیەكی گەورە، بەڵام ئەمریكا ناچار دەكات پەلە بكات لە وەڵامدانەوەی ئەم دەستدرێژییانە.

راشیگەیاند، واشنتن خوازیاری پەرەسەندن نییە لەگەڵ ئێران و دەوڵەتانی دیكەی رۆژهەڵاتی نێوەڕاست دوای روو وەرگێڕانی ئیدارەی نوێی ئەمریكا بۆ چین كە دەڵێن ئەوێ مەترسی گەورەیە نەك رۆژهەڵاتی نێوەڕاست.

ئاماژە بەوەش دەكات كردنە ئامانجی هێزی توركیا كاردانەوەی تێكچوونی پەیوەندی نێوان توركیا و ئێرانە لەسەر هەندێك دۆسێی هەرێمی لە دیارترینیان عێراق و سوریایە.

رونیشیكردەوە پشتیوانی توركیا بۆ ئازەربایجان ئێرانی نیگەرانكردووە و پشتیوانی ئێرانیش بۆ پەكەكە لە شنگال توركیای نیگەران كردووە.

دلێمی دەشڵێت: ئێران بە هێرشەكەی سەر باشیك ئەو پەیامەشی بە
توركیا دا كە خوازیاری جێبەجێكردنی رێككەوتنی شنگال نییە.

شەوی چوار شەممە هێرش كرایە سەر بنكەی هێزی هاوپەیمانان لە هەولێر و هێزی توركیا لە باشیك، بەهۆیەوە سەربازێكی توركیا كوژراو دوو هاوڵاتی سڤیلیش بریندار بوون.