سەردێر

كەركوك، گۆڕانكاریی گەورە لە پۆستە ئەمنییەكاندا دەكرێت

خەڵك-
سەرچاوەكان باس لەو گۆڕانكارییە گەورانە دەكەن كە لە پۆستە ئەمنییەكانی پارێزگەی كەركوكدا دەكرێن، سەرچاوەیەكیش دەڵێت، ئەوانەی دەوترێن تەنیا دەنگۆن و نەكراونەتە بڕیاری فەرمی.

ئەمڕۆ پێنج شەممە، میدیاكانی عیراق لە زاری سەرچاوەیەكەوە بڵاویانكردەوە”عەلی كەمال فەرماندەی پۆلیسی كەركوك گوازراوەتەوە و لەجێگەیدا عەمید كاوە غەریب دانراوە كە لە پۆستی بەڕێوەبەری ئەكادیمیای پۆلیسی پارێزگاكەدایە”.

هەر بە وتەی سەرچاوەكە”لیوای عەلی موتەشەر یاریدەدەری فەرماندەی پۆلیسی كەركوك، پۆستێكی نوێ‌ لە بری ئەم پۆستەی ئێستای وەردەگرێت و عەمید ڕزگار عەبدولخالقیش لە پۆستی بەڕێوەبەری پۆلیسی فریاكەوتن دەستبەكاردەبێت، عەقید مازن غەریب پۆستی بەڕێوەبەری بنكەی پۆلیسی عروبە وەردەگرێت”.

ئەم گۆڕانكارییانەی ئاماژەیان پێكرا، بە بۆچوونی بەرپرسێكی باڵا لە پۆلیسی كەركوك كە قسەی بۆ (خەڵك) كرد، تەنیا دەنگۆن و بە فەرمی بڕیاریان لەسەر نەدراوە.