سەردێر

داوای جێبەجێكردنی ڕێككەوتنی شەنگال دەكرێت

خەڵك-ئارام سەردار

پارێزگاری هەولێر ڕایدەگەیەنێت، ڕووداوی شەوی ڕابردوو پێمان دەڵێت هەندێ بۆشایی ئەمنی هەیە تەنها بەهەماهەنگی نێوان هەردووحكومەت دەتوانن ئەو بۆشاییە نەهێڵن و هێزە ئەمنیەكان باشتر ڕۆڵی خۆیان بگێڕن، بۆیە داوای جێبەجێكردنی ڕێككەوتنی شنگال و گەڕانەوەی پێشمەرگە بۆ ئەو سنورانە دەكەین.

ئومێد خۆشناو، پارێزگاری هەولێر لەكۆنفڕانسێكی ڕۆژنامەوانیدا لە میانەی كردنەوەی پرۆژەیەكدا ڕایگەیاند، ناوچە كوردستانیەكانی دەرەوە پێویستی بەهەماهەنگی هەردوولامان هەیە بۆ ئەوەی خزمەتگوزاری زیاتریان پێشكەش بكەین، پڕۆژەكەش دانانی بەردی بناغەی جووتسایدی هەولێر-گوێڕە، درێژیی (35) كم، گوژمەی دیاریكراو بۆی (20)ملیار دینارە.

ئەوەشی خستەڕوو، پڕۆژەك دەبێتە هۆكاری ئاسان گەیشتنی دانیشتوانی ناوچەكە بۆ هەولێر، فشاری سەر ڕێگای موسڵیش كەم دەبێتەوە، ڕۆڵێكی گەورەی دەبێت لەڕووی كشتووكاڵ و پیشەسازی، بەتایبەت لەڕابردوو زیانی زۆریان پێگەیشتووە لەسەردەمی تیرۆرستان، هیوادارین خزمەتی زیاتر پێشكەش بكەین، كە بەداخەوە لەڕابردوو نەمان توانیووە ئەوە بكەین هۆكارەكەی دیاربووە.

سەبارەت بەڕووداوی شەوی ڕابردوو پارێزگاری هەولێر وتی، ڕووداوەكە پێمان دەڵێت هەندێ بۆشایی ئەمنی هەیە تەنها بەهەماهەنگی نێوان هەردووحكومەت دەتوانن ئەو بۆشاییە نەهێڵن و هێزە ئەمنیەكان باشتر ڕۆڵی خۆیان بگێڕن، پارێزگاری لەسەلامەتی هاوڵاتیان بكەن، هیوادارین ڕێككەوتنی شنگال جێبەجێ بكرێت، پێشمەرگەش بگەڕێتەوە بۆ ئەو سنورانە تاوەكو ئاسایشی ناوچەكە بپارێزن.