سەردێر

خولەكانی دیكەی پەرلەمان چییان كردووە؟

خەڵك
سەرۆكی پەرلەمانی كوردستان دەڵێت، ئەو پێوەرانەی ئێستا پەرلەمانی كوردستانی پێ هەڵدەسەنگێنرێت زۆر جیاوازە لەو پێوەرانەی كاتی خۆی پەرلەمانی كوردستانی پێهەڵدەسەنگێنرا و دەشڵێت خولەكانی دیكە چیان كردووە هەتا ئێمە نەمانكردبێت.

ڕێواز فایەق، سەرۆكی پەرلەمانی كوردستان بە دەنگی ئەمریكای ڕاگەیاندووە، ” بە بەردەوامی گوێم لەو قسەیە دەبێت كە خەڵكی دەستەبژێر، خەڵكی ئاسایی هەرچی دەڵێت، دەیڵێت لە موعاناتی خۆی و لە خەمەكانی خۆی لەوەی كە فەرمانڕەوایی لە هەرێمی كوردستان لە ئاست و خواستی ئەودا نییە هەرچی دەڵێت ئەم بەشەی ئاساییە بەڵام لەسەر ئاستی دەستەبژێر گوێم لەوە دەبێت كە ئەمە لاوازترین خولی پەرلەمانی كوردستانە بەبێ ئەوەی بڵێت بۆ لاوازترین خولی پەرلەمانی كوردستانە چونكە كە یەكێك بە بەهێز ئەژماردەكرێت و یەكێكی تر بەهێزتر ئەژمار ئەكرێت و یەكێك بە لاواز ئەژماردەكرێت دەبێت پێوەرێك هەبێت و بوترێت ئەمە پێوەرەكەیە. بێگومان پێوەرەكان جیاوازن.”

سەبارەت بە ئەزموونی وەك یەكەم خانم لەو پۆستەدا ڕێواس فایەق وتی” لە ڕاستیدا لە سەرەتاكانی كە بووم بە سەرۆكی پەرلەمان بە هیچ شێوەیەك پێشبینی ئەوەم نەدەكرد كە ژن بوون كاریگەری هەبێت لەسەر ئەوەی چۆن كارەكانی پەرلەمانی كوردستان وەكو دامەزراوە هەڵدەسەنگێنرێت بەڵام بە تێپەڕبوونی كات بۆم دەركەوت كە بەڵێ ژن بوون كاریگەری هەیە لە سەر ئەوەی پێوەرەكان بۆ هەڵسەنگاندنی پەرلەمانی كوردستان بە گشتی.

وتیشی، كارەكانی پەرلەمانی كوردستان جۆرێك لە دووفاقی و بێویژدانیشی تێدایە بەوەی كە بە بەردەوامی خەریكی بەراوردكردنی كارەكانی ئەم خولەی پەرلەمانی كوردستانم لەگەڵ كاری خولەكانی تری پەرلەمانی كوردستان لەسەر ئاستە جیاوازەكان، بە بەردەوامی لەگەڵ نزیكترین خول كە خولی چوارەمە بەراوردی دەكەم لەگەڵ خولی سێ بەراوردی دەكەم كە بابڵێین ئەو كاتە ئۆپۆزیسیۆن بەهێزبوو لەگەڵ خولی یەك و دووش بەراوردی دەكەم كە ئەو كاتە یەكێتی و پارتی بە تەنها خۆیان بوون ئەركی سەرۆكی پەرلەمان تا ڕادەیەك جگە لەو ماوەیەی شەڕی ناوخۆ بوو ئاسان بوو، هەستدەكەم ئەو پێوەرانەی ئێستا پەرلەمانی كوردستانی پێ هەڵدەسەنگێنرێت زۆر جیاوازە لەو پێوەرانەی كاتی خۆی پەرلەمانی كوردستانی پێهەڵدەسەنگێنرا.

“كەس لە سەرۆكی پەرلەمانێكی ژن ناترسێت لەوەی هەرچی پێ بڵێت ”

سەرۆكی پەرلەمانی كوردستان سەبارەت بە پێوەری ڕەخنەكان بۆ ئەم خولەی پەرلەمان زیاتر وتی” بەشێكی ڕەنگە پەیوەندی بەوەوە هەبێت كەس لە سەرۆكی پەرلەمانێكی ژن ناترسێت لەوەی هەرچی پێ بڵێت كە ڕەنگە كاردانەوەیەكی بەرامبەری هەبێت بە شێوەیەك لە شێوەكان كە زیانی پێدەگات لەبەر ئەوە هەرچی بە دڵی بێت دەیڵێت ئەوەش بەلای خۆمەوە هەر ئاساییە.

دەشڵێت، بەشێكی تر پەیوەندی بەوەوە هەیە كە لەناو حیزبە سیاسیەكاندا و لەناو خەڵكیش ڕەنگە ئاسان بێت قسە وتن بە ژنێك لە پێگەیەكدایە خۆشی ڕەنگە بەشێكی بۆ ئەوە بگەڕێتەوە كە نایانەوێت ژنێك سەركەوتووبێت لەو پێگەیەدا جارێكی تر ژنێكی تر بیر لەوە نەكاتەوە كە داوای ئەو پۆستە بكات هەرچەندە خۆم پێم وانییە كەسێكی سەركەوتوونیم ئەگەر كاریگەرییەك لەسەر پەرلەمانی كوردستان هەبێت لە ئاستی خواستی خەڵكدا نەبێت ئەمە پەیوەندی بە كەسەكانەوە نییە، پەیوەندی بە دۆخی سیاسی و ئابوری و پەیوەندی هێزە سیاسیەكان، پەیوەندی ڕێكخراوەكانی كۆمەڵگە مەدەنییەكان و میدیاوە هەیە.”
ڕێواز فایەق ئەوەشی وت” ئەم هەموو دامەزراوەیە و ئەنجوومەنی دادوەری یان قەزا لە هەرێمی كوردستان هەمووی خراپە هەمووی بە یەكەوە خراپە ئێمە لە ناو فەزایەداین خۆ من لە ئاسمانەوە نەهاتووم یان كەسێكی جیاواز نیم لە هەمان ئەو ژینگەیە ئێمە پێكەوە لەگەڵ هاوڕێكانماندا ئیش دەكەین لەبەر ئەوە ڕەنگە لە ئاستی خواستی خۆمان نەبێت بەڵام لەبەر ئەوە نییە ئێمە خراپین لەبەر ئەوەیە كە ژینگەكە خۆی لە ڕووی سیاسی و لە ڕووی ئابوری لە پەیوەندی نێوان حیزبەكان ژینگەیەكی نادروستە.

” خولەكانی تری پەرلەمانی كوردستان چیان كردووە تا ئەم خولە نەیكردبێت؟”

ڕێواز دەڵێت” بێگومان دەبێت پێوەر هەبێت، ئەمە لەمە باشترە دەبێت پێوەریان هەبێت، من نازانم پێوەرەكانی ئەو بەڕێزانە چییە ڕەنگە بە پەیوەندی دۆخی سیاسی هەرێمی كوردستانەوە هەبێت بە شێوەیەكی گشتی با بەراورد بكەین خولەكانی تری پەرلەمانی كوردستان چیان كردووە تا ئەم خولە نەیكردبێت؟! ئەگەر بۆ نموونە بڵێین پەرلەمانی كوردستان لەناو سیستەمی سیاسی هەرێمی كوردستاندا پەراوێزترین دامەزراوەیە دروستە، بوترێت كەمترین ڕۆڵی هەیە لە ڕەسمی سیاسەتدا دروستە بەڵام نەك تەنها بۆ ئەم خولەی پەرلەمان.”