سەردێر

نرخی مریشك لە بازاڕەكانی هەرێم گران بوو

خەڵك-
لەگەڵ دەستپێكی مانگی ڕەمەزان جارێكی دیكە نرخی گۆشتی مریشكی زیندوو لە بازاڕەكانی هەرێم بەڕێژەیەكی بەرچاو بەرزدەبێتەوە و ئەوەش نیگەرانی بۆ هاووڵاتیان دروست دەكات.

بەپێی بڕیاری قائیمقامییەتی ناوەندی شارەكانی هەرێم و لیژنەكانی چاودێری نرخ، نابێت لە مانگی ڕەمەزاندا نرخی خۆراك و كاڵاكان لەسەر هاووڵاتیان زیاد بكرێت، بەڵام ماوەی دوو ڕۆژە و لەگەڵ دەستپێكی مانگی ڕەمەزاندا نرخی بەشێك لە كاڵا و خۆراكەكان ڕووی لە بەرزبوونەوە كردووە.

خاوەنی دوكانێكی فرۆشتنی گۆشتی مریشكی زیندوو بۆ (خەڵك) ئاماژەی بەوەكرد، جارێكی دیكە نرخی گۆشتی مریشك بەرزبۆتەوە و ئەمڕۆ نرخی یەك كیلۆیان بە 4 هەزار دینار فرۆشتووە.

ڕاشیگەیاند، “لە كێڵگە پەلەوەرییەكان نرخی یەك كیلۆ مریشكی گەورە، كە كێشی لە 3 كیلۆ و بەرەو سەرەوەبێت كیلۆی بە 3 هەزار و 600 بۆ 3 هەزار و 800 دینارە، كە ئێمە ناچار دەبین بیدەین بە 4 هەزار دینار”.

ئاماژەی بەوەشكرد، بەهۆی كەمی جوجكە لە كێڵگە پەلەوەرییەكان و كردنەوەی ڕێگا بۆ هەناردەكردنی بۆ شارەكانی عیراق، نرخی مریشك گران بووە.

ئەمەش لەكاتێكدایە، كە لە مانگی پێشوودا و لەگەڵ دەستپێكردنی وەرزی بەهار و جەژنی نەورۆز نرخی مریشك بەرزبووەوە و دواتر نرخەكەی دابەزییەوە.