سەردێر

بۆ دابەشكردنی بەشەخۆراك هاووڵاتیان ئاگادار دەكرێنەوە

خەڵك-

لە پارێزگای هەڵەبجە دابەشكردنی بەشە خۆراك دەستی پێكرد و وەزارەتی بارزگانی عیراق-یش ئاشكرای دەكات، كە بڕێكی زۆر شەكر و زەیت ڕەوانەی پارێزگاكان كراوە و دوو بەشەخۆراك دابەش دەكەن.

فەرمانگەی پسووڵەی خۆراک لە پارێزگای هەڵەبجە لە ڕاگەیەنراوێكدا ئاماژەی بەوەكردووە، هاووڵاتیانی ناوەندی شاری هەڵەبجە سەردانی بریکارەکانی خۆراک بکەن بەمەبەستی وەرگرتنی زەیتی مانگی 7ی ساڵی ڕابردوو.

لای خۆشیەوە، وەزارەتی بازرگانی عیراق لە بەیاننامەیەكدا ئاماژەی بەوەكردووە، كۆی ئەو بڕەی ماددەی شەكری بەشەخۆرك، كە ڕەوانەی پارێزگاكان كراوە 65 هەزار و 850 تەنە و هەروەها زەیت 30 هەزار و 504 تەنە، كە بۆ مانگی ڕەمەزان بەسەر هاووڵاتیاندا دابەش دەكرێت.

ڕاشیگەیاندووە، لە 26ی مانگی ئادارەوە تاوەكو 12ی ئەم مانگە لە كاری بەردەوامدا بوون بۆ دابەشكردنی بەشەخۆراكی مانگی ڕەمەزانی پیرۆز.

قاسم حەمود، بەڕێوەبەری گشتی كۆمپانیای دابەشكردنی خۆراك ئاماژەی بەوەكردووە، بە ڕاسپاردەی سەرۆك وەزیران و وەزیری بازرگانی شەكر و زەیت بۆ سەرجەم پارێزگاكان دابین كراوە و تا ئێستا 98%ی گەیشتۆتە پارێزگاكان.

ئاشكراشی كردووە، ئێستا جارێكی دیكە دەستیان كردۆتەوە بە دابەشكردنی بەشەخۆراك تاوەكو لە مانگی ڕەمەزاندا دوو بەشەخۆراك بە هاووڵاتیان بدەن.

لای خۆشیەوە، حەسەن نازم، وتەبێژی ئەنجوومەنی وەزیرانی عیراق لە كۆنگرەیەكی ڕۆژنامەوانیدا ڕایگەیاند، مستەفا كازمی، سەرۆك وەزیران لە كۆبوونەوەی ئەمڕۆی ئەنجوومەن وەزارەتی بازرگانی ڕاسپاردووە بە دابەشكردنی بەشەخۆراكێكی زیادە لەم مانگە پیرۆزەدا.