سەردێر

هەولێر، پێداویستی خۆپارێزی بەسەر مزگەوتەكاندا دابەشكرا

 

خەڵك-ئارام سەردار

بەمەبەستی گرتنەبەر و جێبەجێكردنی ڕێوشوێنەكانی خۆپارێزی لەمزگەوتەكان پارێزگاری هەولێر دەمامك و بەرماڵی بەسەر مزگەوتەكانی هەولێردا دابەش كرد.

ئومێد خۆشناو، پارێزگاری هەولێر لەكۆنفڕانسێكی ڕۆژنامەوانیدا ڕایگەیاند، دوای ئەو ئاسانكاریانەی لەمانگی ڕەمەزاندا كرا ڕێكاری پێویستیش دەگیرێتەبەر بۆ پاراستنی گیانی هاوڵاتیان، بەپێی ڕێنماییەكان و ئەو چوارچێوە خۆپارێزییەی دەگرینە بەر ئەمڕۆ بەهاوكاری ڕێكخراوە مرۆیی و خێرخوازییەكان هەڵمەتی هاوكاری مزگەوتەكان ڕادەگەیەنین و لە قۆناغی یەكەم دابەشكردنی زیاتر لە (1000) تیپ لە دەمامك و موعەقەم و زیاتر لە (20000) بەرماڵە بۆ 400 مزگەوتی سنوری پارێزگای هەولێر. دابین دەكرێت.

دەشڵێت، پێداویستیەكان پێشكەش بە ئەوقافی هەولێر دەكرێت بۆ ئەوەی لە مزگەوتەكاندا دابەش بكرێت ، ئامانجیش لەو هەڵمەتە پاكڕاگرتنی مزگەوتەكانە تا لەوێوە هاوڵاتیانیش سەلامەت بن و بەدڵنیاییەوە ئەركە ئایینیەكانیان جێ بەجێ بكەن.

ئەوەشی خستەڕوو، داوا لەمامۆستایانی ئاینی وەك توێژێكی پێشەنگ لەكۆمەڵگە دەكەین وەك پێشتر هاوكاریمان بكەن بۆ ئەوەی هانی موسلمانان بدەن تا بەپاك و خاوێنی و لەبەرچاوگرتنی رێنماییەكان سەردانی مزگەوتەكان بكەن و بەوهیوایەین كە لەو دۆخە سەختە دەربچین.