سەردێر

سلێمانی، بۆ بەرەنگاربوونەوەی وشكەساڵی بڕیارێك درا

خەڵك
سەرۆكی ئەنجوومەنی پارێزگای سلێمانی ڕایگەیاند، لەپێناو ربەرەنگار بوونەوەی وشكەساڵی بڕیاردرا بەهەڵكەندنی بیر بۆ كێڵگە پەلەوەری و ئاژەڵی و كشتوكاڵییەكان.

ئازاد محەمەد، سەرۆكی ئەنجوومەنی پارێزگای سلێمانی لە كۆنگرەیەكی ڕۆژنامەوانیدا ڕایگەیاند،ئەمڕۆ ئەنجومەنی پارێزگای سلێمانی كۆبوونەوەی ژمارە 61 ی ئەنجامدا كە بەرنامەی كاری كۆبوونەوەكە بڕیاردان بوو لە شێوازی هەڵكەندنی بیر بۆ كێڵگە پەلەوەریەكان و ئاژەڵداری و كشتوكاڵ.

وتیشی، بەپێی بڕگەی هەشت لە یاسای ژمارە 3 ی ساڵی 2009 ی ئەنجوومەنی پارێزگاكانی هەرێمی كوردستان بڕیارماندا هەڵكەندنی بیر بەپێی ڕێنمایەكانی ژمارە 1 ی ساڵی 2015 ی وەزارەتی كشتوكاڵ و سەرچاوە ئاوییەكان بچێتە بواری جێبەجێكردنەوە.

ئاماژەی بەوەشكرد، بڕیارەكە لەپێناو ڕووبوڕووبوونەوەی وشكەساڵیدا جێبەجێدەكرێت و هاوكات ڕێگەش لە هەڵكەندنی بیر بەشێوەی نایاسایی دەگیردرێت.

وتیشی بڕگەیەكی دیكەی كۆبوونەوەكەی ئەمڕۆ گۆڕینی ناوی 4 گوند بوو كەلە بەڕێوەبەرایەتی ناحیەی سەنگاو داواكرابوو بەگۆڕینی ناوەكانیان.