سەردێر

بەنداوی دەربەندیخان نۆژەن دەكرێتەوە

خەڵك-تەنیا هەورامی

بەڕێوەبەری بەنداوی دەربەندیخان ڕایدەگەیەنێت، لە چەند مانگی داهاتوودا بۆ جارێكی دیكە بەنداوەكە نۆژەن دەكەینەوە.

بەهۆی بومەلەرزە بەهێزەكەی ساڵی 2017ی باشوور و ڕۆژهەڵاتی كوردستان، بەنداوی دەربەندیخان زیانی زۆری بەركەوت و وەك چارەسەرێكی سەرەتایی بەشێكی بەنداوەكە نۆژەنكرایەوە لە مەترسی داڕوخان ڕزگاركرا، بەڵام دوای ئەو چەند ساڵە حكومەتی عێراق و هەرێمی كوردستان نەیانتوانیوە چارەسەرێكی یەكلاكەرەوە بۆ ئەنجام بدەن.

ڕەحمان خانی، بەڕێوەبەری بەنداوی دەربەندیخان بە (خەڵك)ی ڕاگەیاند، حكومەتی عێراق تا ئێستا نەهاتوون بۆ چارەسەركردنی كێشەكانمان و هیچ دیار نییە، كە بڕە پارەیەك تەرخان بكەن بۆ بەنداوەكە دەكات یان نا.

وتیشی، “لەلایەن حكومەتی هەرێمەوە بودجەیەك تەرخان كراوە و هەوڵ دەدەین لە ماوەی مانگێكدا دەست بە پڕۆسەی تەندەرین بكەین بۆ بانگهێشتكردنی كۆمپانیاكان بۆ جێبەجێكردنی ئەو كارانەی، كە لە بەنداوەكەدا وەكو قۆناغی دووەمی چاكسازی ماوە”.