سەردێر

وەزارەتی شارەوانی وەڵامی جێگری سەرۆكی حكومەت دەداتەوە

خەڵك

وەزارەتی شارەوانی و گەشتوگوزار وەڵامی جێگری سەرۆكی حكومەت دەداتەوە و دەڵێت، كەس رێگری لە مافی كەسوكاری شەهیدان و ئەنفالكراوان و زیندانییانی سیاسیی نەكردووە، “بەڵام دابەشكردنی زەوی، رێكاری یاسایی هەیە و ناكرێ بەرپرسانی حیزبیی لایەنێك، لە جیاتی وەزارەتی شارەوانی و گەشتوگوزار و لایەنە پەیوەندیدارەكان، ئەو كارە بكەن.”

لە ڕوونكردنەوەی وەزارەتی گەشتوگوزاردا هاتووە، “لە ماوەی رابردوودا ژمارەیەكی زۆری سكاڵامان لە لایەن كەسوكاری شەهیدان و ئەنفالكراوان و زیندانیانی سیاسی پێگەیشتووە كە ناویان لەو لیستانەدا نییە كە هیچ هێز و لایەنێك ناتوانێت مافی ئەمانە فەرامۆش بكات.”

شارەوانی و گەشتوگوزار باسی لەوە كردووە، “بنەماڵەی سەربەرزی شەهیدان و ئەنفالكراوان و زیندانییانی سیاسی سەر بە هەر لایەنێك بن، هەمان مافیان هەیە و پێویستە بە بێ فەرق و جیاوازی هەموو كەسوكاری شەهیدان و ئەنفالكراوان و زیندانییانی سیاسی لە سەرجەم شارەكانی كوردستان بە یەك چاو سەیر بكرێن و خزمەت بكرێن، بەجۆرێك دوای وردبینی كردن و دڵنیابوون لە راستی و دروستیی ناوەكان لەلایەن وەزارەتی شەهیدانەوە و گرتنەبەری رێكارە یاساییەكان، زەوییان پێ ببەخشرێت نەوەك ئەو پرۆسەیەی كە ئێستا بەبێ ئاگاداری و هەبوونی فەرمانی فەرمی وەزارەتی شارەوانی، لە هەندێك شوێن بەڕێوەدەچێت.”

ڕوونكردنەوەی دووەمی وەزارەتی شارەوانی و گەشتوگوزار دوای ئەوە دێت، بەیانیی ئەمڕۆ هەینی 9-4-2021 ڕوونكردنەوەیەكی بڵاوكردەوە و باسی لەوە كردبوو، “ڕەفتاركردن و دابەشكردنی زەوی دەبێت بەشێوەیەكی دادپەروەرانە بێت، بۆ هەموو خەڵكە موستەحەق و شیاوەكان بێت، بەپێی بڕیار و رێكار و بنچینە یاساییەكان بێت.”

دواتر قوباد تاڵەبانی، جێگری سەرۆكی حكومەتی هەرێم دڵنیایی دایە كەسوكاری شەهیدان و ئەنفالكراوان كە زەوییەكانیان پێدەدرێت. و وتی، “هیچ كەس و هێزێك نییە، بتوانێت لەبەردەم مافە رەواكانتان بوەستێتەوە.”

هەروەها، لوقمان وەردی سەرۆكی لیژنەی شارەوانی گواستنەوە و گەیاندن وگەشتوگوزار لە پەرلەمانی كوردستان ڕاگەیەنراوێكی بڵاوكرەوە و ڕایگەیاند، دابینكردنی زەوی نیشتەجێبوون و شوێنی حەوانە بۆ سەرجەم ھاووڵاتیان ئەركی حكومەتە و كەس ناتوانێت ئەم مافە لەكەسوكاری ئەو كەڵە پیاو و میرخاسانە زەوت بكات، كە ئەوان لە ڕۆژگارە سەختەكاندا لەپێناو ھاتنە كایەی ئەم ئەزموونە حكومڕانییەی ھەرێمی كوردستان دا، خوێنیان بەخشیووە.

دەقی روونكردنەوەی وەزارەتی شارەوانی و گەشتوگوزار

كەس ڕێگری لە مافی كەسوكاری شەهیدان و ئەنفالكراوان و زیندانییانی سیاسی نەكردووە وەك ئەوەی بە پێی یاسا و ڕێكارەكان مافەكانیان پێناسە كراوە. بەڵام دابەشكردنی زەوی، ڕێكاری یاسایی هەیە و ناكرێ بەرپرسانی حیزبیی لایەنێك، لە جیاتی وەزارەتی شارەوانی و گەشتوگوزار و لایەنە پەیوەندیدارەكان، ئەو كارە بكەن و دەسەڵات بۆ مەرامی سیاسی بە كار بهێنن. لەبەر ئەوەی لە ماوەی ڕابردوودا ژمارەیەكی زۆری سكاڵامان لە لایەن كەسوكاری شەهیدان و ئەنفالكراوان و زیندانیانی سیاسی پێگەیشتووە كە ناویان لەو لیستانەدا نییە كە هیچ هێز و لایەنێك ناتوانێت مافی ئەمانە فەرامۆش بكات.

بنەماڵەی سەربەرزی شەهیدان و ئەنفالكراوان و زیندانییانی سیاسی سەر بە هەر لایەنێك بن، هەمان مافیان هەیە و پێویستە بە بێ فەرق و جیاوازی، هەموو كەسوكاری شەهیدان و ئەنفالكراوان و زیندانییانی سیاسی لە سەرجەم شارەكانی كوردستان بە یەك چاو سەیر بكرێن و خزمەت بكرێن ، بەجۆرێك دوای وردبینی كردن و دڵنیابوون لە ڕاستی و دروستی ناوەكان لەلایەن وەزارەتی شەهیدانەوە و گرتنە بەری ڕێكارە یاساییەكان، زەویان پێ ببەخشرێت نەوەك ئەو پرۆسەیەی كە ئێستا بەبێ ئاگاداری و هەبوونی فەرمانی فەرمی وەزارەتی شارەوانی، لە هەندێك شوێن بەڕێوە دەچێت.

ئێمە خۆمان بە خەمخۆری كەسوكاری سەربەرزی شەهیدان و ئەنفالكراوان دەزانین و داواش دەكەین سامانی سەرزەوی و ژێر زەوی كوردستان، بۆ خزمەتی كەسوكاری شەهیدان و ئەنفالكراوان بەكاربێنین، بە تایبەتی لە سنووری گەرمیان.

وەزارەتی شارەوانی و گەشتوگوزار