سەردێر

فارس نەوڕۆڵی: سەرۆکی هەرێم هەوڵی یەکڕیزی دەدات

سلێمانی – نزار جەزا

 

وتەبێژی ئەنجومەنی سەرکردایەتی پارتی دیموکراتی کوردستان لەسلێمانی و هەڵەبجە لەچاوپێکەوتنێکیدا لەگەڵ (خەڵک) باسی لەگرنگی کۆبوونەوەکەی ئەمڕۆی نێوان لایەنە سیاسیەکان و سەرۆکی هەرێم کرد. هاوکات هیوایخواست لایەنەکان بەسایکۆلۆژیای کێشەکانەوە نەچنە نێو کۆبوونەوەکان و بەنەفەسی براوە و دۆڕاو گفتوگۆ نەکەن، چونکە ئامانجە سەرەکییەکەی سەرۆکی هەرێم یەکڕیزی لایەنەکانە.

 

فارس نەوڕۆڵی، وتەبێژی ئەنجومەنی سەرکردایەتی پارتی دیموکراتی کوردستان لەسلێمانی و هەڵەبجە ڕايگەیاند، پێشتر سەرۆکی هەرێمی کوردستان پەیامی گرنگی هەبووە، بەڵام بەدیاریکراوی ئەگەر پەیامەکەی نەورۆزی بخوێنینەوە، دەبینین کە لەقوڵایی باوەڕی خۆیەوە بەپێویستی دەزانی، لەم قۆناغەدا لێکترازانی نێوان لایەنە سیاسییەکان نەمێنێت و لایەنەکان کۆبکرێنەوە، بەگشتی پەیامەکەی نەورۆز پەیامێکی سەمفۆنیایي بوو، واتە هەموو دەنگەکانی لەخۆدەگرت.

 

ئاماژەى بەئەوەشدا، کورد لەنێو ماڵی خۆیدا ئەگەر جیاوازیشی هەبێت، پێویستە یەک گوتاری هەبێت، چونکە ئەگەر لەم قۆناغەدا فریای خۆمان نەکەوین گۆڕانکارییەکان جێماندەهێڵن، بۆیە ئەم هەنگاوەی سەرۆکی هەرێم بۆ کۆکردنەوەی لایەنە سیاسییەکان مێژووییە و درککردنە بەو گۆڕانکارییە سیاسییانەى لەجیهان و ناوچەکە دەگوزەرێت.

 

باسی لەئەوەشکرد، هیوادارە لایەنە سیاسییەکان بەسایکۆلۆژیای کێشەکانەوە نەچنە نێو کۆبوونەوەکانەوە و هەر بەو سایکۆلۆژیایەوە گفتوگۆنەکەن، بەو ئامانجە گفتوگۆبکەن، کە میلەتی کورد ماندووە و پێویستی بە ئارامی کۆمەڵایەتی و سیاسی هەیە.

 

ئەوەشی باسکرد، هەموو لایەنەکان درکیان بەئەوەکردووە، ناوچەکە لەگۆڕانکاری خێرادایە بەتایبەت دوای دەستبەکاربوونی ئیدارەی نوێی ئەمریکا، کوردیش ژمارەیەکی گەورەیە لەناوچەکە و سەردانەکەی سەرۆکی هەرێم بۆ فەرەنسا ئەوەی پیشاندا، کە ژمارەیەکی گەورەیە، بۆئەوەی ئەم ژمارەیەش بەهێزبێت دەبێت لایەنەکان یەکگوتاربن و بەنەفەسی بردنەوە و دۆڕاندن گفتوگۆنەکەن.

 

وتیشی: یەکگوتاری نێوماڵی کورد نەک بۆ مامەڵە لەگەڵ عیراق، بەڵکو بۆ مامەڵە لەگەڵ وڵاتانی دیکەش گرنگە، چونکە ئەوان وەک کورد مامەڵە دەکەن، بەڵام ئەگەر کورد پەرتەوازەبێت، ئەوانیش ناتوانن باوەڕ بەکورد بکەن.

 

ئەوەشی خستەڕوو، بوونی جیاوازی لەنێوان لایەنە سیاسییەکان ئاساییە، بەڵام نابێت بگاتە ئەوەی میللەت باجەکەی بدات.

 

دەقی چاوپێکەوتنەکە: