سەردێر

نزیكەی 15 هەرزان بازاڕ داشكانی نرخ دەكەن

 

خەڵك

بەڕێوەبەری چاودێری بازرگانی سلێمانی دەڵێت، نرخی كاڵاو شمەكەكان لە بازاڕەكانی سلێمانی لە ژێر كۆنتڕۆڵدایە و بۆ مانگی ڕەمەزانیش نزیكەی 15 هەرزان بازاڕ كاڵاو شمەك بە نرخی هەرزان بە هاووڵاتیان دەفرۆشن.

سۆران عەبدولغەفور، بەڕێوەبەری چاودێری بازرگانی سلێمانی بە (خەڵك)ی ڕاگەیاند، نرخی سەوزەو میوە و سەرجەم كاڵاكان لە بازاڕەكانی سلێمانیدا بۆ ئێستا و مانگی ڕەمەزانیش لەژێر كۆنتڕۆڵە، ئەگەر هەندێك بەرزبوونەوە هەبێت لە نرخی ئەو كاڵانەدایە كە لە دەرەوەی هەرێم هاوردە دەكرێن، چونكە نرخەكان بە دۆلار دادەنرێت و نرخی دۆلاریش بەرامبەر بە دینار بەرزە.

وتیشی، لەناو شاری سلێمانیدا نزیكەی 15 هەرزان بازاڕ لە مانگی ڕەمەزاندا كاڵاو شمەكەكان بە نرخێكی هەرزانتر دەفرۆشن بەهاووڵاتیان و لەڕوی كوالێتیشەوە پشكنین بۆ كاڵاكان دەكرێت.

ئاماژەی بەوەشكرد، لیژنەی نرخمان هەیە ڕۆژانە سەردانی شوێنەكان دەكەن و هەر بەرزبوونەوەیەك لە نرخدا ڕووبدات لیژنەكەمان دەچێتە ئەو جێگایەو داوای پسوڵەی كڕینی لێدەكەین ئەگەر زانیمان نرخی بەڕێژەیەكی زۆر بەرزكردۆتەوە رووبەڕووی ڕێكاری یاسایی دەكەینەوەو شوێنەكەش دادەخەین.

بەڕێوەبەری چاودێری بازرگانی سلێمانی دەشڵێت، دەبێت هەموو شوێنەكان نرخ لەسەر كاڵاكانیان دابنێن تا هاووڵاتیان ئاگاداربن و هەر بەرزبوونەوەیەك ڕووبدات لیژنەكەمان ئاگادار بكەنەوە.

ئاماژەی بەوەشكرد، هاووڵاتیان دڵنیادەكەینەوە كە بەهۆی هاتنی مانگی ڕەمەزانەوە كاری لیژنەكەمان چڕتر كردووەتەوەو نرخی سەرجەم كاڵاوشمەكەكان وەرگیراوە بە تایبەت شیرینی و شەربەت كە لە ڕەمەزاندا خواستێكی زۆری هاووڵاتیانی لەسەرە و ناهێڵین گۆڕانكاری لەنرخدا ڕووبدات.