سەردێر

لە كۆبوونەوەی ئەمڕۆدا، داوای پەڕلەمانتاران پشتگوێخراوە

خەڵك-

ئەمڕۆ پەڕلەمانی كوردستان كۆدەبێتەوە و بەپێی زانیارییەكان، خوێندنەوەی دووەم بۆ پێشنیازە یاسای هاوردەكردن و فرۆشتنی بەرهەمە نەوتییەكان لە هەرێم دەكرێت.

دەستەی سەرۆكایەتی پەڕلەمانی كوردستان لە ڕاگەیەنراوێكدا ئاماژە بۆ ئەوە دەكات كاتژمێر 11ی پیشنیوەڕۆی ئەمڕۆ چوار شەممە كۆدەبنەوە و بەرنامەی كاری كۆبوونەوەكەش بریتییە لە خوێندنەوەی دووەم بۆ پێشنیازە یاسای هاوردەكردن و فرۆشتنی بەرهەمە نەوتییەكان لە هەرێمی كوردستان.

هەر لە ڕاگەیەنراوەكەدا هاتووە كە خوێندنەوەی یەكەم بۆ پێشنیازەیاسای ڕێكخستنی ئامێرەكانی چاودێری لەهەرێمی كوردستان و پێشنیازە بڕیاری ڕۆژی ڕۆژنامەگەریی كوردی لەهەرێمی كوردستان دەكرێت.

ئەمەش لەكاتێكدایە، دوێنێ زیاتر لە 20 پەڕلەمانتار داوایان لە دەستەی سەرۆكایەتی پەڕلەمان كرد، بابەتی بڕینی مووچەی فەرمانبەران بخرێتە بەرنامەی كارەوە، بەڵام بەپێی ڕاگەیەنراوەكە دەستەی سەرۆكایەتی هیچ بڕگەیەكی لەو بابەتەی بۆ كۆبوونەوەكە دیاری نەكردووە.