سەردێر

تەندروستی بۆ ڕەمەزان بڕیار لە كەرەنتینە و قەدەغەی هاتووچۆ دەدات

هەولێر- ئارام سەردار
بەڕێوەبەری گشتی تەندروستی هەولێر هۆشداری بە هاووڵاتیان دەدات، كە ئەگەر پابەندی ڕێنماییەكان نەبن كەرەنتینەی گشتی ڕادەگەیەنرێت و دەشڵێت: “ڕۆژانە ئامارەكانی تووشبوون بە كۆرۆنا لە هەڵكشانە”.

د. دلۆڤان محەمەد، بەڕێوەبەری گشتی تەندروستی هەولێر لە لێدوانێكی ڕۆژنامەوانیدا، كە پەیامنێری (خەڵك) ئامادەی بوو ڕایگەیاند، ڕۆژانە ئامارەكانی كۆرۆنا لە هەڵكشانە و قورسایی لەسەر نەخۆشخانەكان زۆرە، بەڵام بەسوپاسەوە ئێستا هاووڵاتیان پابەندبوونیان ڕێنماییەكان باش بووە و هیوادارین هەمووان پابەندبن تا ئامارەكان كەم ببنەوە.

ڕاشیگەیاند، ئەگەر ئامارەكانی تووشبوون بە پەتاكە هەر لە هەڵكشان بێت، ئەوا لەكاتی كۆبوونەوەی لیژنەی باڵای ڕووبەڕووبونەوەی كۆرۆنا ناچار دەبین ڕێكاری توندتر بگرینەبەر.

سەبارەت بە ئەگەری ڕاگەیاندنی قەدەغەی هاتووچۆ و كەرەنتینە د. دلۆڤان وتی، “ئێمە ئەگەرەكانمان تاوتوێ‌ كردووە و ئەگەر ئامارەكان لە هەڵكشان بن ئەوا داواكاری ئەوەمان دەبێت ڕێكارەكان تووند بكرێنەوە و ئەگەری ڕاگەیاندنی قەدەغەی هاتووچۆش هەیە”.

جەختیشی كردەوە، ئێمە سەیری ئامارەكان دەكەین، كە لە ئێستادا لە هەڵكشانە و لە چەند ڕۆژی داهاتووشدا چاودێری دۆخەكە دەكەین و ئەگەر ئامارەكان هەر زیادبن ئەوا لیژنەی زانستی وەزارەت پێشنیاری پێویست بۆ دۆخەكە دەخاتەڕوو بۆ لیژنەی باڵای كۆرۆنا و ژووری ئۆپراسیۆنی هەولێر.

سەبارەت بە مانگی ڕەمەزان-یش وتی، “داوامان ئەوەیە هاووڵاتیان لە ڕەمەزاندا دەمامك ببەستن و قەرەباڵغی دروست نەكەن بەتایبەتی لە شەواندا، كە زیاتر خەڵك دێنە دەرەوە، بۆیە ئەگەر هاووڵاتیان پابەند نەبن ئەوا ناچار دەبین ڕێكاری توندتر بگرینەبەر و داوای لانی كەم بەردەوامی دان بە داخستنی شوێنەكان لە 9ی شەو تاوەكو بەیانی دەكەین”.

لە وەڵامی پرسیاری پەیامنێری (خەڵك) دەربارەی ئەوەی لە 4ی عەسر تاوەكو 8ی بەیانی قەدەغەی هاتووچۆ لە ڕەمەزاندا دەكرێت؟ د. دلۆڤان ڕایگەیاند، لە دوو ڕۆژی داهاتوودا كۆبوونەوە دەكەین و پێشنیاری خۆمان دەبێت لەسەر بنەمای شیكردنەوەی داتا و ئامارەكان.