سەردێر

ئەمینداری یەكگرتوو داوای چی لە ڕێكخەری گۆڕان كردووە؟

خەڵك-
ئەمڕۆ لە مەكۆی سەرەكی گۆڕان لە گردی زەرگەتە كۆبوونەوەی باڵای بزووتنەوەی گۆڕان و یەكگرتووی ئیسلامی كوردستان ئەنجام درا.

بەپێی زانیارییەكان، ئامانجی سەرەكی كۆبوونەوەی بزووتنەوەی گۆڕان و یەكگرتووی ئیسلامی كوردستان باسكردن بووە لە پەیوەندییەكانی نێوان هەردوو حزب، كە لەدوای هەڵبژاردنەكانی ڕابردووی پەڕلەمانی كوردستانەوە ساردی تێكەوتووە بەتایبەتی، كە گۆڕان لە بەرەی ئۆپۆزسینەوە چۆتە ناو دەسەڵات و ئێستا لە كابینەی نۆیەمی حكومەتی هەرێم بەشدارە.

هەر بەپێی زانیارییەكان، لەو كۆبوونەوەیەدا، سەڵاحەدین محەمەد بەهادین، ئەمینداری گشتی یەكگرتوو و شاندی یاوەری بە فەرمی داوایان لە عومەری سەید عەلی، ڕێكخەری گشتی گۆڕان كردووە هاوپەیمانی پێكبهێنن بۆ هەڵبژاردنی داهاتووی پەڕلەمانی عیراق.

(خەڵك) زانیویەتی، “یەكگرتوو بە فەرمی داوای لە گۆڕان كردووە بە یەك لیست بەشداری لە هەڵبژاردنی پێشوەختەی پەڕلەمانی عیراق بكەن، كە بڕیارە لە مانگی 10ی ئەمساڵ ئەنجام بدرێت”.

بۆ وەرگرتنی زانیاری زیاتر (خەڵك) چەند جارێك پەیوەندی كرد بە چەند بەرپرسێكی گۆڕان و یەكگرتووەوە، بەڵام پەیوەندییەكانیان بەردەست نەبوون.

لای خۆشیەوە، ئەبوبەكر هەڵەدنی، ئەندامی پەڕلەمانی كوردستان لە فراكسیۆنی یەكگرتوو ڕایگەیاندووە، گفتوگۆ ئێستا هەیە لەنێوان لایەنەکان بۆ پێکهێنانی بەرەیەکی سیاسی بۆ هەڵبژاردن.

وتوشیەتی، “هیوادارم ئەو لایەنانە بەیەکەوە بەرەیەک دروست بکەن و چیتر تواناکانی خۆیان بە فیڕۆ نەدەن و خەریکی شەڕی لاوەکی نەبن”.