سەردێر

ئەڵمانیا بە بڕی 10 ملیۆن یۆرۆ هاوكاری كوردستانی كردووە

 

خەڵك-ئارام سەردار

لەلایەن پارێزگاری هەولێر و كونسوڵی ئەڵمانیا هەڵمەتی هۆشیاری دژی كۆرۆنا ئەنجامدرا و ژمارەیەك دەمامك و پێداویستی خۆپارێزیش لەنێوبازاڕ دابەشكرا و كونسوڵی ئەڵمانیا وتی لە ڕوبەرووبونەوەی كۆرۆنادا بەبڕی 10 ملیۆن یۆرۆ هاوكاری كوردستانمان كردووە.

ئومێد خۆشناو، پارێزگاری هەولێر لەوتەیەكدا ڕایگەیاند، بەداخەوە جارێكی تر تووشبوون بەكۆڕۆنا لەهەڵكشاندایە و سەڕەڕای گرتنەبەری ڕێوشوێنی پێویست لەلایەن حكومەت بەڵام ڕۆژانە تووشبوون بە ڤایرۆسەكە و مردن لەزیادبووندایە، وەك هەنگاوێكی تریش بۆ ڕێگری لەتەشەنەكردنی زیاتری ڤایرۆسەكە لەگەڵ پارێزگاكانی ناوەڕاست و خوارووی عیراق هاتووچۆمان ڕاگرتووە.

دەشڵێت، داوا لە هاوڵاتیان دەكەین پابەندی ڕێنماییەكان بن و خۆیان بپارێزن، چونكە دۆخەكە مەترسیدارە، ئێمەش لەگرتنەبەری ڕێكاری پێویست و هەڵمەتی هۆشیاری بەردەوام دەبین، ڕاستە ڕەنگە هەندێ ڕێكار كاریگەری لەسەر ژیانی هاووڵاتیان هەبێت بەڵام ئەوە بۆ سەلامەتی گیانی هەمووانە، هەروەها سوپاسی هاوكاریەكانی ئەڵمانیا دەكەین.

لای خۆشیەوە كونسوڵی ئەڵمانیا لە هەرێمی كوردستان وتی، ماوەی زیاتر لەساڵێكە مامەڵە لەگەڵ كۆرۆنا دەكەین، دەزانین هەموومانی ماندووكردووە، بەڵام نابێت كۆڵبدەین و پێویستە ڕوبەڕووی ببینەوە بە خۆپارێزی، چونكە دەكرێ هەموان تووشی ئەو ڤایرۆسە ببین.

باسی لەوەشكرد، لەماوەی ساڵێكدا بە بڕی 60 ملیۆن یۆرۆ هاوكاریمان پێشكەش بە عێراق كردووە بۆ ڕووبەڕووبونەوەی كۆرۆنا و لەو بڕەش نزیكەی 10 ملیۆن یۆرۆ هاوكاری گەیشتۆتە كوردستان و لە هاوكارییەكانیشمان بەردەوام دەبین.

No description available.