سەردێر

هەورە گۆگردییەكە بەڕێوەیە و وەزارەتی تەندروستیش ڕێنمایی هاووڵاتیان دەكات

خەڵك-
فەرمانگەی هۆشیاركردنەوە و ڕاگەیاندنی ژینگەیی لە وەزارەتی تەندروستی عیراق، داوا لە هاووڵاتیان دەكات بەردەوامبن لە بەستنی كەمامە و داخستنی پەنجەرەی ماڵەكان و پشتبەستن بە ئامێری فێنككردنەوە و داپۆشنی تەنكی ئاوەكان، بۆ خۆلادان لەو زیانانەی بەهۆی هەورە گۆگردییەكەوە دروست دەبن كە ڕوو لە عیراق دەكات.

لەگەڵ ئەوانەدا، فەرمانگەكە ڕایگەیاند”پێویست بە نیگەرانی زۆر ناكات، لەو هەورە گۆگردییەی لە ئیتاڵیاوە ڕووی لە وڵاتانی ناوچەكە كردووە لە ماوەی 24 كاتژمێری داهاتوو”.

بەپێی كەشناسە عیراقییەكان”هەورێكی گۆگردی بەهۆی گڕكانی چیای ئتنا لە دوورگەی سەقلیەی ئیتاڵیا بەڕێوەیە و چەند ڕۆژێك بەردەوام دەبێت”.

گڕكانەكە هەورێكی گەورە و كەشێكی نائاسایی دروستكرد كە بووە مایەی داخستنی فڕۆكەخانەكانی كاتانیای ئیتاڵیا، تائێستاش هیچ نیشانەیەكی هێوربوونەوە لەو بارەیەوە بەدی ناكرێت.

بەپێی دەزگا كەشناسییە جیهانییەكان كە وێنەی ئەو هەورە گەورەیەیان بڵاوكردۆتەوە و لە دووەم ئۆكسیدی كبریت پێكدێت و لە ئەنجامی گڕكانەكەوە دروستبووە، ڕووی لە ناوچەی خۆرهەڵاتی ناوەڕاست كردووە، بە تایبەتیش لوبنان و ئەردەن و عیراق و چەند ناوچەیەك لە سعودیە.