سەردێر

پێشمەرگە، چەند مووچەیەكى دیكە بەسەریەكەوە وەردەگرێت

خەڵك-

دوای ئەوەی ڕۆژی پێنج شەممە لیواكانی پێشمەرگە 3 مووچەیان پێكەوە وەرگرت (جگە لە لیواكانی 9 و 12) بڕیارە بۆ جارێكی دیكە چەند مووچەیەك وەربگرن.

لە دوو ڕۆژی ڕابردوودا، 10 لیوای سەر بە وەزارەتی پێشمەرگە 3 مووچەیان بە بێ لێبڕین وەرگرت، ئەمەش لەكاتێكدایە دەبوو پێش دوو مانگ ئەو مووچانە وەربگرن، بەڵام وەك بەرپرسانی پێشمەرگە ئاماژەیان بۆكردبوو، بەهۆی كێشەی هونەرییەوە مووچەكان دواكەوت نەك كێشەی دیكە.

سەرچاوەیەك، لە وەزارەتی پێشمەرگەوە، كە نەیویست ناوی ئاشكرا بكرێت بە (خەڵك)ی ڕاگەیاند، پاش ئەو سێ مووچەیەی كە هەفتەی ڕابردوودا بەسەر لیواكانی وەزارەتی پێشمەرگە دابەشكرا، بڕیارە لە داهاتوودا بۆ جارێكی دیكە چەند مووچەیەكی تر بەو لیوایانە بدرێت.

وتیشی، “ئەمریكییەكان دەیانەوێت مووچەی ئەو مانگانەی، كە لە ساڵی ڕابردوو بەو لیوایانە نەدراوە بەش بەش بدەنەوە بە لیواكان”.

بەهۆی قەیرانی داراییەوە، حكومەتی هەرێمی كوردستان لە ساڵانی ڕابردوو بە پاشەكەوتەوە مووچەی فەرمانبەرانی دابەشكرد، بەڵام لەم كابینەیەدا هەرچەندە چەند مانگێك بە لێبڕینەوە دابەش كرا، بەڵام ساڵی ڕابردوو 7 مووچەش نەدرایە فەرمانبەران و هێزە سەربازی و ئەمنییەكان.